सार्वजनिक उपयोगका लागि कोभिड–१९ को खोपको शुभारम्भ मिति तोकिनु सही नभएको भन्दै भारतीय वैज्ञानिकहरूले चेतावनी दिएका छन् । 

दी इन्डियन एकेडमी अफ सायन्सेजले हतार गर्दा कठोर वैज्ञानिक प्रक्रिया र मापदण्डमा सम्झौता गर्नुपर्ने बाध्यता आइलाग्ने चेतावनी दिएको छ । 

दी इन्डियन काउन्सिल अफ मेडिकल रिसर्चले भारतको स्वतन्त्रता दिवस अर्थात् अगस्ट १५ मा खोप सार्वजनिक गर्ने लक्ष्य राखेको जनाएको थियो । 

तर आईसीएमआरले यो मिति कुनै डेडलाइन नभएको जनाएको थियो । 
 

आईसीएमआरका प्रमुख बलराम भार्गवले कोभाक्सिन नामक खोपको मानवमाथिको परीक्षणका लागि छानिएका १२ वटा संस्थालाई पत्र पठाएर अगस्ट १५ को मिति तोकेपछि यो विवाद उठेको हो । 

त्यसमा उनले मानवीय परीक्षण द्रुत गतिमा गर्नुपर्ने ताकि स्वतन्त्रता दिवसमा त्यसलाई सार्वजनिक गर्न सकियोस् भनी निर्देशन दिएका थिए । 

त्यस विषयलाई झनै अस्पष्ट बनाउने गरी भारतको विज्ञान प्रविधि मन्त्रालयले कोभाक्सिन लगायत कुनै पनि खोप सन् २०२१ अगावै सार्वजनिक उपयोगका लागि तयार हुने सम्भावना नरहेको भनी अघिल्लो बयानमा उल्लेख गरेको एक पंक्ति नै डिलिट गरिदिएको थियो । 

त्यसपछि विरोध र आलोचनाको शृंखला नै चल्यो । धेरैले अगस्ट १५ को डेडलाइन देखावटी मात्र भएको र यसले भारतको विश्वसनीयतालाई गम्भीर असर पार्ने बताए । 

बीबीसीबाट