सुर्खेतस्थित मध्यपश्चिमाञ्चल विश्वविद्यालयका उपकूलपति प्रा.डा. नन्दबहादुर सिंहले रजिस्ट्रार र डीनको नियुक्ति खुला प्रतिस्पर्धाबाट गर्ने प्रक्रिया शुरू गरेका छन् ।

उनी उपकुलपति भएर आएपछि असार २२ गते एक सूचना जारी भएको छ, त्यो सूचनाले उच्च शिक्षा क्षेत्रमा तरङ्ग ल्याएको छ ।

सार्वजनिक सूचनामार्फत मध्यपश्चिमाञ्चल विश्वविद्यालय (एमयू) ले रजिस्ट्रार र डीन नियुक्तिका लागि दरखास्त आह्वान गरेको छ । एमयूले सोमवार सूचना जारी गर्दै इच्छुक र योग्य व्यक्तिबाट दरखास्त आह्वान गरेको हो । यसअघि रजिस्ट्रार र डीनको नियुक्ति राजनीतिक भनसुन र पहुँचका आधारमा हुने गरेको थियो ।

सूचनाअनुसार रजिस्ट्रारका लागि ७ दिन र डीनका लागि १० दिनभित्र दरखास्त दिनुपर्ने छ । रजिस्ट्रारको हकमा शैक्षिक प्रशासनमा विशिष्टतासहित भिजन पेपर पेश गर्नुपर्ने मापदण्ड तोकिएको छ ।

डीनका लागि मध्यपश्चिमाञ्चल विश्वविद्यालयको सम्बन्धित संकायका प्राध्यापक वा सम्बन्धित संकायमा सेवा गरेका सहप्राध्यापक वा मान्यता प्राप्त विश्वविद्यालयका सम्बन्धित संकायका प्राध्यापक वा सहप्राध्यापक हुनुपर्ने उल्लेख छ । डीनका लागि पनि आवेदनसँगै भिजन पेपर पेश गर्नुपर्ने सूचनामा उल्लेख छ ।

मध्यपश्चिमाञ्चल विश्वविद्यालय ऐन २०६७ को दफा २५ बमोजिम रजिस्ट्रारको नियुक्ति उपकुलपतिको सिफारिसमा कुलपति (प्रधानमन्त्री) बाट हुने प्रावधान छ । सोही ऐनको दफा २६ मा डीनहरूको नियुक्ति कार्यकारी परिषद्को निर्णयअनुसार उपकुलपतिबाट हुने भनिएको छ तर कानूनी प्रावधानमा टेकेर सहजै रजिस्ट्रार र डीन नियुक्त गर्न सकिने भए पनि उपकुलपतिले विश्वविद्यालयलाई प्राज्ञिक क्षेत्रको रुपमा विकास गर्न खुला प्रतिस्पर्धाबाट दरखास्त आह्वान गरेका छन् ।

विश्वविद्यालयमा ४ डीन खाली

विश्वविद्यालयमा कार्यरत प्राध्यापक खोपीराम लम्साल मानविकी र सामाजिक शास्त्र संकायको डीनको रुपमा कार्यरत थिए । उनको कार्यकाल २०७६ चैत २७ गते सकिएपछि पद रिक्त छ । विज्ञान तथा प्राविधिक संकायका डीन प्रा.डा. देवबहादुर खड्का पनि सोही मितिदेखि पदमुक्त भइसकेका छन् । 

व्यवस्थापन संकायका डीन डा. मस्तबहादुर गरन्जाको पदावधि जेठ १७ गते सकिएको छ । उनी ३ महिना निमित्त उपकुलपति समेत बनेका थिए ।

हालका निमित्त रजिस्ट्रार यामबहादुर कार्कीको पनि असार २५ गते कार्यकाल सकिँदैछ । उनी हाल शिक्षाशास्त्र संकायका डीन पनि हुन् । उनी २०७५ मंसिरमा निमित्त रजिस्ट्रार बनेका थिए ।

‘मध्यपश्चिमाञ्चल विश्वविद्यालय र सम्भवतः नेपालका विश्वविद्यालयको इतिहासमा नै पहिलोपटक प्रतिस्पर्धाबाट रजिस्ट्रार र डीनहरूको नियुक्ति गर्ने प्रक्रियाको प्रारम्भ हुनु उपकुलपतिज्युको अत्यन्तै अनुकरणीय कदम हो । यस्तो प्रक्रियाले विश्वविद्यालयमा शैक्षिक प्रशासनिक रूपमा अब्बल, दक्ष र विश्वविद्यालय बुझेको नेतृत्व पाउनेमा आशावादी हुन सकिन्छ,’ शिक्षाशास्त्र संकायका सहायक डीन विष्णुबहादुर खड्काले भने, ‘यो अभ्यासले यसअघि उपकुलपतिले आफ्नो स्वविवेकमा नियुक्त गर्ने पदहरू कम्तीमा पारदर्शी रूपमा योग्यता पुगेका व्यक्तिहरूको बीचमा प्रतिस्पर्धा गराई तिनीहरूमध्ये उत्कृष्टलाई पदीय जिम्मेवारी दिने गर्नाले योग्य व्यक्ति पदमा आउने हुनाले विश्वविद्यालयको शैक्षिक प्राज्ञिक र प्रशासनिक गतिविधि सक्षम नेतृत्वबाट सञ्चालित हुने सम्भावना रहन्छ ।’