कोभिड-१९ महामारीबाट प्रभावित किसानलाई बुटवल उपमहानगरपालिकाले प्रोत्साहनसहित आर्थिक सहयोग प्रदान गरेको छ।

उपमहानगरपालिकाले आफूले घोषणा गरेको कार्यक्रमअनुसार नगरका ५८  किसान र  दुई सहकारीलाई नगद अनुदान प्रदान गरेको हो। नगर प्रमुख  शिवराज सुवेदी,  उपप्रमुख गुमादेवी आचार्य, प्रमुख प्रशासकीय अधिकृत चक्रपाणि शर्मालगायतले छनोट भएका किसानलाई आज राहत रकम प्रदान गरे।

सो अवसरमा नगर प्रमुख सुवेदीले किसानलाई कुनै पनि प्रकोपबाट प्रभावित हुन नदिनका लागि नगरपालिकाले आफ्नो योजनानुसार सहयोग गरेको बताउनुभयो । कृषि पेशालाई आकर्षण र व्यावसायिक बनाउन बुटवलले दीर्घकालीन महत्वका किसान लक्षित कार्यक्रम सञ्चालन गरेको उनले जानकारी दिए।

उपमहानगरपालिका कृषि विकास शाखा प्रमुख सन्तोष जिसीका अनुसार छनोट भएका किसानलाई कार्य प्रगतिअनुसार १५ हजारदेखि २० हजार तथा सहकारीलाई एक लाख र एक लाख ४० हजार अनुदान गरी कुल ११ लाख ४० हजार अनुदान प्रदान गरिएको हो। अनुदान पाउनेमा सिम्रिक कृषि सहकारी संस्था लिमिटेड र आदर्श कृषि सहकारी संस्था लिमिटेड छन् । तिनै सहकारीसँगको सहकार्यमा  उपमहानगरपालिकाले किसानलाई फसल धितो राखेर अनुदान दिंँदै आएको छ । सहकारीलाई  बोरासहितको छपाइ मेसिन र सीड ड्रिल मेसिन खरीदका  लागि अनुदान प्रदान गरिएको हो ।

 कोभिड–१९ विशेष कृषि कार्यक्रमका लागि बीउ उत्पादक समूह वा सहकारीलाई प्रोत्साहन कार्यक्रमअन्तर्गत  अनुदान प्रदान गरिएको कृषि विकास शाखा प्रमुख जिसीको भनाइ छ ।  उपमहानगरपालिकाले नगरका कृषकलाई आवश्यक बीउ, मल, औजारलगायतमा सहयोग गर्दै आएको प्रमुख प्रशासकीय अधिकृत शर्माले बताए।