चीनले हङकङमा नयाँ राष्ट्रिय सुरक्षा कार्यालय आधिकारिक रूपमा खोलेको छ । अर्थात् पहिलोपटक त्यहाँ चिनियाँ मुख्यभूमिका एजेन्टहरू परिचालन गरिएका छन् । 

नयाँ कानून पारित गरेपछि यो कार्यालय स्थापना गरिएको हो । यस कानून अन्तर्गत चीन सरकारको आलोचना दण्डनीय अपराध बनेको छ ।

यो कानून पारित नहोउन्जेल हङकङ मात्र त्यस्तो चिनियाँ भूमि थियो जहाँ सरकारको आलोचना गर्न छुट थियो । 

कानूनले हङकङमा त्रास फैलाएको छ तर अधिकारीहरूले यसबाट स्थिरता आउने बताएका छन् । 

हङकङकी प्रमुख कार्यकारी क्यारी लामले राष्ट्रिय सुरक्षा कानूनहरूको अध्ययन गर्ने हो भने यो कानून अलिक नरमै भएको बताइन् । यसले हङकङवासीहरूलाई भयभीत नभई तथा आक्रमणमा नपरी अधिकार तथा स्वतन्त्रता अभ्यास गर्न समर्थ बनाउने उनको भनाइ छ । 

नयाँ खोलिएको अस्थायी कार्यालय कजवे बेको एक होटलमा छ । त्यो व्यापारिक केन्द्र भिक्टोरिया पार्कमा छ जहाँ लोकतन्त्रसमर्थक विरोध प्रदर्शन र जुलूसहरू हुने गरेका छन् । 

कार्यालय शुभारम्भको एक समारोह बुधवार बिहान राखिएको थियो र त्यसमा क्यारी लाम तथा कार्यालय प्रमुख झेङ यानसियोङ उपस्थित थिए । 

कार्यालय बाहिर चिनियाँ झण्डा फहराइएको थियो र कडा सुरक्षा प्रबन्ध मिलाइएको थियो ।

चिनियाँ मुख्यभूमिका सुरक्षा एजेन्टहरू नयाँ कार्यालयमा रहनेछन् र पहिलोपटक उनीहरूले नयाँ कानूनबाट परिभाषित विभिन्न अपराधको अनुसन्धान गर्नेछन् । दोषी ठहर गरिएकाहरूले पुर्पक्षका लागि उनीहरूले चिनियाँ मुख्यभूमि लग्नेछन् । 

चीनमा पुर्पक्षहरूले शतप्रतिशत कसूर ठहर गर्ने गरेका छन् ।

बीबीसीबाट