भारतको राजस्थानमा कांग्रेस नेतृत्वको गठबन्धन सरकारमा संकट आइलागेको छ । 

कांग्रेसका दिग्गज नेता तथा उपमुख्यमन्त्री सचिन पाइलटले कडा दृष्टिकोण राख्न थालेपछि अशोक गहलोत सरकार संकटमा परेको देखिएको छ । 

पाइलटले गहलोतको सरकार सञ्चालनप्रति असन्तुष्टि व्यक्त गर्दै विद्रोह गरेका छन् र आफूसँग ३० जना विधायकको समर्थन रहेको बताएका छन् । यसैबीच उनले भारतीय जनता पार्टीसँग पनि सम्पर्क गरेको बताइएको छ । 

त्यसो त पाइलटले नयाँ दल खोल्न सक्ने र त्यसको नाम प्रगतिशील कांग्रेस राख्न सक्ने समेत बताइएको छ । 

पाइलटले तेस्रो मोर्चा बनाउनुमा विभिन्न महत्त्वपूर्ण कारण रहेको बताइन्छ । अहिले उनीसँग गहलोत सरकार गिराउनका लागि पर्याप्त विधायक नरहेको बताइँदैछ । 
 

गहलोत पनि निरन्तर विधायक र पार्टी नेताहरूसँग सम्पर्क र बैठकमा छन् । उनले ह्विप जारी गरेर बैठकमा सहभागी नहुने मन्त्री र विधायकमाथि कारवाही गरिने बताएका छन् । 

यस्तो स्थिति रहेकाले समेत पाइलटले थर्ड फ्रन्टको विकल्पमा विचार गरिरहेका हुन् ।

राजनीतिक संघर्ष जारी रहँदा सोमवार बिहान पौने ३ बजे कांग्रेसले पत्रकार सम्मेलन आयोजना गरेको छ । त्यसमा पार्टीले ह्विप जारी गरेको र अवज्ञा गर्नेमाथि अनुशासनात्मक कारवाही गरिने बताएको छ । 

त्यसो त पाइलटले आफूसँग ३० विधायकको समर्थनको दाबी गरेका छन् । तर तेस्रो मोर्चा बनाउनका लागि उनले कांग्रेस पार्टीका एक तिहाइ विधायकलाई आफ्नो पक्षमा पार्नुपर्ने हुन्छ । बहालवाला विधायकको संख्याको आधारमा हेर्दा पाइलटले कम्तीमा ३५ विधायकको समर्थन लिनुपर्ने देखिन्छ । 

पाइलटको विद्रोही पारा देख्दा कतै उनी मध्य प्रदेशका ज्योतिरादित्य सिन्धियाको बाटोमा हिँड्दै त छैनन् भन्ने अनुमान गर्न थालिएको छ । सिन्धियाले कांग्रेस छोडेर भाजपामा प्रवेश गरी कमलनाथ सरकार गिराइदिएका थिए । 

विभिन्न सूत्रहरूले पाइलट भाजपाको सम्पर्कमा रहेको बताउँदै आएका छन् ।