महालेखा परीक्षकको कार्यालयले फेसबुक, भाइबर लगायत सामाजिक सञ्जाललाई नेपालमा दर्ता गराएर राजस्व असुल गर्नुपर्ने सुझाव दिएको छ। 

महालेखाको ५७ औँ प्रतिवेदनले ‘नेपालमा सञ्चालित कतिपय सामाजिक सञ्जाल र ओभर दि टप (ओटीटी) सेवाका निम्ति डलर खाताबाट रकम भुक्तानी समेत भइरहेको’ निस्कर्ष निकाल्दै  ती सेवालाई नेपालमा दर्ता गरेर राजस्व असुल गर्न भनेको हो।

प्रतिवेदनमा भनिएको छ, ‘इन्टरनेट सेवामार्फत इन्टरनेट टेलिफोन सेवा प्रदान गर्ने भाइबर, फेसबुक, मेसेन्जर, स्काइप, ह्वाटस् एप, विच्याट, इमो, जुम, बेभेक्स, सिस्कोजस्ता एप्लिकेसनहरु नेपालमा निर्बाध रुपमा सञ्चालन भइरहेको र कतिपय सेवाको लागि अमेरिकी डलर खाताबाट रकम भुक्तानी समेत भइरहेको छ।’

महालेखाका अनुसार इन्टरनेट सेवामार्फत सञ्चालनमा आएका त्यस्ता सामाजिक सञ्जाल र ओटीटी आयकर ऐनको दफा ६७ बमोजिम नेपालको कराधार क्षेत्रभित्र पर्छन्। त्यसैले  सेवा प्रदान गर्नुपूर्व दर्ता हुनुपर्ने  भनिएको छ।