काठमाडौं – सुन्दर भविष्यको सपना बोकेर उच्च शिक्षा अध्ययनका लागि त्रिभुवन विश्वविद्यालय छिर्ने विद्यार्थी तथा ज्ञान बाँड्ने प्राध्यापकहरू कीर्तिपुरस्थित प्रवेशद्वारबाट भित्र पस्ने वित्तीकै एकपटक झस्किन्छन् । 

सडकमा खाल्डाखुल्डी, बाटो छेउमै फोहोरको थुप्रो र धूलोले जो कोहीलाई पनि असहज महसूस हुन्छ । देशकै सबैभन्दा पुरानो र प्रतिष्ठित विश्वविद्यालयको अवस्था तपाईंले सोचेभन्दा निकै फरक पाउनुहुन्छ ।

त्रिवि केन्द्रीय क्याम्पस कीर्तिपुरस्थित विभिन्न विभाग आसपासमा कतै फोहोर त कतै बाटो बिग्रेर धुलाम्मे भएको छ ।

विश्वविद्यालयको मुख्य क्षेत्र भएर ठूला–ठूला सवारी साधन समेत आवत–जावत बाटो त बिग्रिएको छ नै त्यस आसपासमा अध्ययनरत विद्यार्थीहरूलाई समेत असर परेको छ ।

भित्रैबाट हिँड्ने ठूला सवारी साधनका कारण सडक आसपासमै रहेका भवनमा अध्ययनरत विद्यार्थीलाई असर पर्ने गरेको त्रिवि केन्द्रीय क्याम्पस भौतिक शास्त्र विभागका सह–प्राध्यापक गोपिचन्द्र काफ्ले बताउँछन् ।

वनस्पती शास्त्र, जैविक प्रविधि केन्द्रीय विभाग लगायतका विभाग र केन्द्रीय पुस्तकालय आसपासको अवस्था नाजुक बनिसकेपनि कसैले वास्ता नगरेको उनको गुनासो छ ।

वनस्पती शास्त्र केन्द्रीय विगाग तथा जैविक प्रविधि केन्द्रीय विभागको अगाडि रहेका रूखहरू सुकेर जीर्ण अवस्थामा छन् ।

हावा चल्दा रुखका हाँगा भाँचिएर टाउकोमा लाग्ने हो कि भनी डर लाग्ने गरेको त्रिवि वनस्पती शास्त्र विभागमा अध्ययनरत विद्यार्थी मोहन गिरी बताउँछन् ।

सडकको खाल्डाखुल्डीका कारण लडेर घाइते हुने हो कि भन्ने चिन्ता समेत रहेको उनको गुनासो छ ।

ढल, इन्टरनेट फाइबर र खानेपानीको पाइपका लागि खनेको बाटो १० महिना नाघिसक्दा पनि मर्मत हुन सकेको छैन ।

बाटोमा सवारीको चाप, धूलो र फोहोरले गर्दा शान्त र सफा वातवरणमा पढ्न नपाएको अर्की विद्यार्थी नमूना अधिकारी बताउँछिन् । यसमा विश्वविद्यालय प्रशासनको तत्काल ध्यान जानुपर्ने उनको भनाइ छ ।