काठमाडौं – अपराजेय ठानिने टर्कीका राष्ट्रपति रजब तैयप अर्दोआनलाई स्थानीय निर्वाचनमा ठूलै झड्का लागेको छ । 

उनको दलले राजधानी अंकारामा हार बेहोर्नुपरेको छ र विपक्षले इस्तानबुलमा पनि आफ्नो जीतको दाबी गरेको छ । 

अर्दोआनले कुनै कमी भए त्यसलाई ठीक पार्ने जिम्मेवारी आफूहरूको भएको बताएका छन् । 

देशको अर्थव्यवस्था कमजोर भइरहेको अवस्थामा यो चुनाव भएको हो । चसनावलाई अर्दोआनको नेतृत्वमाथिको जनमतसंग्रहका रूपमा हेरिएको छ । 

चुनावमा ५.७ करोड मतदाताले मेयर र काउन्सिलर छान्नका लागि भोट दिएका थिए । 

टर्कीको मिडियाका अनुसार, सेक्युलर पीपुल्स पार्टीका उम्मेदवार मन्सूर यावासले अंकारामा पर्याप्त भोट पाएर जितेका छन् । 

तर देशको सबभन्दा ठूलो शहर इस्तानबुलमा सीएचपी र अर्दोआनको पार्टी एकेपी दुवैले जीतको दाबी गरिरहेका छन् । 

सीएचपी उम्मेदवार एक्रेम इमामोग्लूले २८ हजार भोट पाएर जितेको दाबी गरेका छन् । उता एकेपी उम्मेदवार पूर्व प्रधानमन्त्री बिनाली यील्द्रिमले आफू चार हजार भोटसहित अगाडि रहेको बताएका छन् । 

दुवै उम्मेदवारलाई ४० लाख भोट प्राप्त भएको बताइएको छ । 

सीएचपी नेता कमाल किलिडारोग्लूले भने, ‘मानिसहरूले लोकतन्त्रको पक्षमा भोट दिएका छन् र लोकतन्त्र छानेका छन् ।’

यसैबीच अर्दोआनले आफ्ना समर्थकहरूसँग कुराकानी गर्दै एकेपीले इस्तानबुलमा हार बेहोर्न सक्ने संकेत दिएका छन् । 

उनले भने, ‘हामीहरू मेयरको पद पाएनौं भने पनि जिल्लाहरू चाहिँ एकेपीले नै जित्नेछ ।’

टर्कीमा आमनिर्वाचन सन् २०२३ मा हुँदैछ र अर्दोआन देशको अर्थव्यवस्था सुधार्ने वाचा गरिरहेका छन् ।

बीबीसीबाट