राहुल गान्धी वायनाडबाट उठ्ने भएपछि वामपन्थीहरू रुष्ट

काठमाडौं – भारतको लोकसभा निर्वाचनमा केरलको वायनाड सीटबाट कांग्रेस अध्यक्ष राहुल गान्धीले उम्मेदवारी दिएपछि लेफ्ट (वामपन्थी) सँग कांग्रेसको सम्बन्ध बिग्रिएको छ । राहुलको उम्मेदवारीका कारण लेफ्टभित्र विवादको स्थिति छ र सीपीएमका महासचिव सीताराम येचुरी एक्लै परेको देखिँदैछ । 

राहुलप्रति नरम दृष्टिकोण राख्ने सीताराम येचुरी पार्टीमा एक्लिएका हुन् । 


Advertisement

वामपन्थी चुनावको मुखमा विवादमा पर्नुभन्दा समान विचारधारा भएका दलसँग तालमेलमा लाग्नुपर्ने येचुरीको भनाइ छ । अहिलेको एक मात्र लक्ष्य भाजपालाई हराउनु हो भन्ने उनको मान्यता छ । 

त्यसका लागि उनले पश्चिम बंगालमा कांग्रेससँग गठबन्धनको प्रयास गरेका थिए र केरलमा उनी नरम देखिएका छन् । तर उनी पार्टीमा एक्लो परेका छन् । पार्टीको ठूलो खेमाले कांग्रेससँग नजिकिनुभन्दा आफ्नो शक्ति बढाउनु उपयुक्त हुने मान्यता लिएको छ । 

लेफ्ट पार्टी र येचुरीका लागि पहिलो झड्का पश्चिम बंगालमा लाग्यो । त्यहाँ येचुरीले कांग्रेससँग सीट बाँडफाँडको सम्झौता नगरिकनै ६ सीट छोडेका थिए । तीमध्ये दुई सीटमा उनैका सांसद थिए । 

तर प्रारम्भिक प्रयासपछि पनि दुई दलबीच गठबन्धन हुन सकेन । दुवै पार्टी मुर्शिदाबाद सीटमा विषयमा अडिए र अन्त्यमा दुवैजनाको बाटो अलग्गियो । 

लेफ्टलाई दोस्रो झड्का केरलको वायनाड सीटमा लाग्यो । राहुल गान्धी उक्त सीटबाट उठेपछि लेफ्ट अलमल्ल प–यो । कांग्रेसले त्यसको आधिकारिक घोषणा गरेपछि येचुरीले तिरुवनन्तपुरममा पत्रकार सम्मेलन गर्नुपर्ने थियो । 

कांग्रेसको निर्णयले लेफ्टलाई आश्चर्यमा पारिदियो । राहुल केरलको वायनाड आउनुलाई लेफ्टले गलत कदम भन्यो । कांग्रेसले लेफ्टलाई एक्लै पारेको हो भन्ने प्रश्नमा पनि येचुरी मौन रहे । 

वायनाडबाट राहुलको उम्मेदवारीका विषयमा पनि येचुरीले अन्य लेफ्ट नेताको तुलनामा नरम दृष्टिकोण अपनाउँदै त्यो अर्को पार्टीको आन्तरिक विषय भएको बताए । कांग्रेसले धर्मनिरपेक्ष दलहरूसँग मिलेर एउटा सन्देश दिनुपर्थ्यो भन्ने उनको विचार रह्यो । 

तर लेफ्टका दिग्गज नेताहरू र केरल युनिटले कांग्रेसमाथि चर्को आक्रमण गरे । प्रकाश करात र केरलका मुख्यमन्त्री पिनराई विजयन समेतका नेताले राहुल गान्धीको यो फैसलाबाट कांग्रेसको लडाईं भाजपाविरुद्ध नभई लेफ्टविरुद्ध भएको बताए । 

एजेन्सी

कमेन्ट गर्नुहोस्