पत्रकार खशोग्गीको हत्याको तालिम साउदीहरूले अमेरिकामा लिएको खुलासा

काठमाडौं – साउदी पत्रकार जमाल खशोग्गीको हत्याका विषयमा अमेरिकी पत्रिका द वाशिङटन पोस्टको रिपोर्टमा नयाँ खुलासा भएको छ । 

रिपोर्टअनुसार, खशोग्गीको हत्या गर्नुअघि आरोपितहरूले अमेरिकामा ट्रेनिङ लिएका थिए । खशोग्गी त्यही पत्रिकामा काम गर्थे । 


Advertisement

सन् २०१८ को अक्टोबर २ मा खशोग्गी टर्कीको इस्तानबुलस्थित साउदी अरब वाणिज्य दूतावास गएका थिए । त्यहाँ रियादबाट पठाइएका साउदी टीमका १५ एजेन्टहरूले उनको हत्या गरेर शवलाई टुक्राटुक्रा पारेका थिए । खशोग्गीको शव अहिलेसम्म फेला परेको छैन । 


Advertisement

द वाशिङटन पोस्टका स्तम्भकार डेभिड इग्नेसियसका अनुसार, टर्कीको जासूसी संस्थाले साउदी दूतावासबाट केही रेकर्डिङ प्राप्त गरेको थियो । त्यसमा खशोग्गीलाई अपहरण गर्ने र साउदी अरब लगेर सोधपुछ गरिने योजना थियो । 

त्यसो गर्नुअघि खशोग्गीलाई एउटा इन्जेक्सन दिइयो । अनि उनको टाउकोलाई एउटा झोलाले ढाकियो । खशोग्गीले त्यसपछि सास फेर्न गाह्रो भएको बताए । आफूलाई दम भएको उनको भनाइ थियो । 

तत्कालै खशोग्गीको मृत्यु भयो । अनि रेकर्डिङमा फरक फरक आवाज सुनिए । त्यो खशोग्गीको लाश टुक्राटुक्रा पार्नका लागि विद्युतीय कटरबाट निस्केको आवाज हुनसक्ने इग्नेसियसको भनाइ छ । 

इग्नेसियसले एक सूत्रलाई उद्धृत गर्दै साउदी –यापिड इन्टरभेन्सन ग्रूपका केही एजेन्टले अमेरिकामा तालिम लिएको बताए । 

उक्त प्रशिक्षण हत्याकाण्डअघि साउदीसँग गरिएको सम्झौताअन्तर्गत भएको थियो । हत्याकाण्डपछि यसलाई अघि बढाइएन र अमेरिका र साउदीबीचका अन्य कार्यक्रम पनि रद्द गरियो । 

अमेरिकाको जासूसी निकाय सीआईएले पत्रकार खशोग्गीको हत्या साउदी युवराज मोहम्मद बिन सलमानको इशारामा गरिएको रिपोर्ट दिएको थियो । साउदीमा ११ आरोपितमाथिको पुर्पक्ष शुरू भइसकेको छ ।

एजेन्सी
 

कमेन्ट गर्नुहोस्