भद्रपुर – अर्जुनधारा नगरपालिकाले महिला स्वयंसेविकालाई जनताको घरघर पठाएर घरधुरी कर उठाउन शुरू गरेको छ । 

११ वडा रहेको नगरपालिकामा ३५ स्वयंसेविका घरघर पठाएर नगरले बनाएको मापदण्डअनुसार घरधुरी कर उठाउन जेठ १४ गतेबाट शुरू गरेको कार्यालयका सूचना अधिकृत डेनजनी आचार्यले बताए ।

उनका अनुसार गत वर्षदेखि नै घरधुरी कर लिने ९ प्रकारको मापदण्ड बनाएर नगरपालिकाले जनताकै घरमा पुगेर कर उठाउन थालेको हो । उनले फुसको साधारण घरको २० रुपैयाँ, टिनको छानो सेन्ट्रल बेरा गरिएको १ तलाको ६० रुपैयाँ, टिनको छानो १ तला पक्कीको ८० रुपैयाँ, पहिलो तला ढलाइ गरिएको र दोस्रोमा टिनको छानो लगाएकोमा १ सय ५० रुपैयाँ, पक्की घर एकतलाको १ सय ५० रुपैयाँ, २ तलेको २ सय २० रुपैयाँ, ३ तलेको ३ सय रुपैयाँ, ४ तले भएमा ४ सय ५० रुपैयाँ र ४ तलाभन्दा माथि भएमा ६ सय रुपैयाँका दरले घरधुरी कर उठाउने गरिएको बताए ।

उनले अन्य नगरपालिकाले एकीकृत सम्पत्ति कर र सम्पत्ति कर लगाए पनि अर्जुनधारा नगरपालिकाले भने मालपोत र घरधुरी कर मात्र लगाएको बताए । मालपोत भने जनताले आ–आफ्नै वडामा तिर्ने गरेका छन् ।

स्वयंसेविका गाउँका कुना कुनासम्म पुगिरहेका र सबैसँग परिचित हुने हुँदा उनीहरूलाई दैनिक १ हजार रुपैयाँ भक्ताको व्यवस्था गरेर काममा लगाइएको सूचना अधिकृत आचार्यले बताए ।

विक्रम संवत् २०६८ को जनगणनाअनुसार ६० हजार २ सय ४ जनसंख्या अर्थात् हाल ७० हजार बढी जनसंख्या र १३ हजार १३६ घरधुरी रहेको छ । वडा नम्बर ६ मा खटिएकी तुलसा कुँवरले दैनिक ४५ घर परिवारकोमा पुगेर अनिवार्य घरधुरी कर उठाउन नगरले नियम बनाएको बताए । उनले सोही नियमअनुसार नै घरमूली भेटिने समय पारेर आफूहरूले काम गरिरहेको बताए ।