काठमाडौं - कलाकार, लेखक तथा नाटक निर्देशक खगेन्द्र लामिछानेले अब चलचित्र निर्देशन गर्ने भएका छन् ।

खगेन्द्रको निर्देशनमा ‘पानीफोटो’ नामक चलचित्र बन्ने भएको हो । राजधानीमा एक कार्यक्रमकाबीच आईतबार चलचित्र निर्माणको औपचारिक घोषणा गरिएको छ ।

टुकी आर्टस् प्रा.ली र मञ्जुश्री फिल्म प्रोडक्सनको ब्यानरमा बन्ने चलचित्रमा रोजिना सिटौला र रबिन्द्र बज्राचार्यको लगानी रहनेछ् । चलचित्रमा खगेन्द्रकै कथा रहनेछ् । पन्ध्र वर्ष अगाडि बेपत्ता भएको आफ्नो छोराको पर्खाइमा बसेका बाबुआमाको कथामा चलचित्र बन्ने लेखक, निर्देशक तथा कलाकार खगेन्द्रले जानकारी दिए । ‘पानीफोटो’ ८ वर्ष अगाडी मञ्चन भएको खगेन्द्रकै नाटक ‘पानीफोटो’बाट अनुरुपण गरिएको हो । 

चलचित्रमा खगेन्द्रका साथमा सुनील पोखरेल, निशा शर्मा पोखरेल, अनुप बराल, मेनुका प्रधान, प्रकाश घिमिरे, माओत्से गुरुङ्ग, बुद्धि तामाङ्ग, कमलमणी नेपाल, आशान्त शर्मा, श्याम कुमार खड्का लगायतको अभिनय रहनेछ् ।
‘यो चलचित्र निर्देशन गर्नु मेरा सपनाहरु मध्येको एक सपना हो’ घोषणा कार्यक्रममा खगेन्द्रले भने, ‘विगतका चलचित्रबाट सिकेका कुरालाई सदुपयोग गरि इमान्दारितापूर्वक चलचित्र बनाउनेछु ।’ आउँदो भदौबाट सुटिङ सुरु हुने चलचित्र काठमाडौं, चितवन, स्याङजा र रोल्पामा छायाँकन गरिनेछ ।

दीपक बज्राचार्यले खिच्ने चलचित्रलाई निमेष श्रेष्ठ र अर्जुन कार्कीले सम्पादन गर्नेछन् । खगेन्द्र जीवन्त अभिनय गर्ने कलाकारमा पर्छन् । यसअघि उनले ‘टलकजंग भर्सेज टुल्के’ ‘पशुपति प्रसाद’, ‘धनपती’, ‘डम्बरुको डण्डिबियो’, ‘जय भोले’ लगायतका चलचित्रमा अभिनय गरेका छन् ।