काठमाडौं – वालमार्ट समेत ६०० भन्दा बढी अमेरिकी कम्पनीहरूले बिहीवार राष्ट्रपति डोनल्ड ट्रम्पलाई चेतावनी दिएका छन् । चिनियाँ सामानमा आयातकर लगाउँदा अमेरिकी अर्थव्यवस्थामा नोक्सानी हुने चेतावनी उनीहरूले दिएका हुन् । 

चीनसँगको व्यापारयुद्धले रोजगारी गुम्ने तथा हजारौं उपभोक्ता प्रभावित हुने उनीहरूको भनाइ छ । अमेरिकी सञ्चारमाध्यमका अनुसार, थोक व्यापारी, उत्पादक र प्रविधि क्षेत्रका कम्पनीहरू लगायतले ट्रम्पलाई पत्र लेखेर व्यापारयुद्ध अन्त्य गर्न भनेका छन् । 

अतिरिक्त आयातशुल्क लगाउँदा अमेरिकाको व्यापार, कृषिक्षेत्र र सर्वसाधारणमा लामो समयसम्म नकारात्मक असर पर्ने अमेरिकी कम्पनीहरूको भनाइ छ । 

मे महिनामा अमेरिकाले २०० अर्ब डलरको चिनियाँ आयातमा १० प्रतिशत करलाई बढाएर २५ प्रतिशत पुर्‍याएको थियो । लगेज, म्याट्रेस, ह्यान्डब्याग, भ्याकूम क्लीनर लगायतक सामानमा कर बढाइएको छ ।

ट्रम्पले ३०० अर्ब डलरको अतिरिक्त आयातमा पनि कर बढाउने धम्की दिएका छन् । 

अमेरिकी कम्पनीहरूका अनुसार, चीनबाट आउने वस्तुहरूमाथि आयातशुल्क चीनले नभई आफैंले दिनुपर्ने भएकाले सामानको भाउ बढ्छ । 

अमेरिका र चीनबीच व्यापार वार्ता अनिश्चित भएपछि बजार अस्तव्यस्त भएको छ । यसले गर्दा अमेरिकाको आर्थिक वृद्धि खतरामा परेको कम्पनीहरू बताउँछन् ।

एजेन्सी