खोटाङ – हलेसी तुवाचुङ नगरपालिकाका प्रमुख इवन राईदेखि रुष्ट बनेका ४ वडाध्यक्षसहितका स्थानीयले मंगलवार नगरपालिका कार्यालयमा धर्ना दिएका छन् ।

नेपाल कम्युनिस्ट पार्टी (नेकपा)बाट निर्वाचित ४ वडाध्यक्षको मागलाई नगर प्रमुख राईले बेवास्ता गरी नगरसभा गरेको विरोधमा उत्रिएका वडाध्यक्षसँगै २६ जनप्रतिनिधि सहितका स्थानीयले दुर्छिमस्थित नगरपालिकाको कार्यालय अगाडि धर्ना दिएका हुन् ।

केन्द्रबाट बजेट बढेर आएपनि वडालाई अघिल्लो वर्षको तुलनामा कम बजेटको सिलिङ दिएको तथा टोलबस्तीबाट प्राथमिकीकरण गर्दै ल्याइएका वडास्तरीय योजनालाई लत्याइएको भन्दै वडा नम्बर २ डिकुवाका वडाध्यक्ष हरिकुमार खड्का, वडा नम्बर ३ च्यास्मिटारका वडाध्यक्ष भलाराज राई, वडा नम्बर ५ दुर्छिमका वडाध्यक्ष रमेश तिवारी र वडा नम्बर ७ महादेवस्थानका वडाध्यक्ष चइन्द्र राईले नगरसभा बहिष्कारको घोषणा गरेका थिए । उनीहरूले नगरसभा बहिष्कार गरेको हप्ता दिनपछि मंगलवार दिउँसो करीब १ घण्टा धर्ना दिएका हुन् ।

४ वडाध्यक्षले आर्थिक वर्ष २०७४/७५ को लेखा परीक्षण प्रतिवेदन सार्वजनिक गर्न, आव २०७५/७६ को वार्षिक प्रगति समीक्षा गर्न, एकमुष्टमा बजेट विनियोजन गर्ने परिपाटी अन्त्य गर्नलगायतका माग राखेपनि बेवास्ता गरिएकाले धर्ना दिइएको वडा नम्बर ७ का वडाध्यक्ष राईले बताए । सम्बन्धित वडाको जनप्रतिनिधिलाई थाहै नदिई कतिपय योजनाको उपभोक्ता समिति गठन गरिएको, हालसम्मको आन्तरिक राजस्व चुस्तदुरुस्त नदेखाइएको, योजनालाई कार्यकर्ता लक्षित गरिएको उनीहरूको जिकिर छ ।

आफ्नो मागलाई बेवास्ता गरेपछि आफूहरू असार ३१ गतेको चौथो नगरसभा टुंगिनुअगावै बाहिरिएको दुर्छिमका वडाध्यक्ष तिवारीले बताए । चरणबद्ध आन्दोलनमा उत्रिएका उनीहरूले बुधवार बिहान ६ बजेदेखि ७ बजेसम्म हलेसीमा र दिउँसो १ बजेदेखि २ बजेसम्म च्यास्मिटारमा १/१ घण्टा चक्काजाम गर्ने जनाएका छन् । 

नगर प्रमुख राईले वडाको सिलिङमा उल्लेख भएअनुसारको योजना हुबहु पास गरिएकाले विरोध गर्नुको औचित्य नभएको बताए । ‘विरोधका लागि विरोध हो भने त्यसको कुनै औचित्य छैन,’ उनले भने, ‘महालेखा परीक्षकको प्रतिवेदन प्रमुख प्रशासकीय अधिकृत र लेखा शाखाले सार्वजनिक गर्ने हो । तत्काल सार्वजनिक गर्न निर्देशन दिएको छु । रह्यो वार्षिक प्रगति समीक्षा । उहाँहरू समेतको सहभागितामा बसिएको कार्यपालिकाको बैठकले साउन महिनाभित्र गर्ने निर्णय भएको छ ।’ 

नगर प्रमुख राई र उपप्रमुख विमला राई नेपाली कांग्रेसबाट निर्वाचित हुन् । जिल्लाको प्रमुख धार्मिक तथा पर्यटकीयस्थल हलेसी रहेको उक्त नगरपालिकामा नेपाली कांग्रेसबाट निर्वाचित जनप्रतिनिधिको बहुमत रहेको छ ।