काठमाडौं – मंगलवार प्रतिनिधि सभाको विशेष समयमा बोल्ने क्रममा नेपाली कांग्रेसका सांसद देवेन्द्रराज कँडेलले ३८ वर्ष पुरानो नमिता सुनिता हत्या काण्डको उदाहरण पेश गरे । 

‘२०३८ सालमा पोखरामा नमिता–सुनिता हत्याकाण्ड भएको थियो, दरबार र श्रीपेचको आडमा त्यो घटना लुकाइयो । विना श्रीपेचका सिंहदरबारका जनप्रतिनिधिको आडमा कञ्चनपुर घटना भएको महसूस गरेको छु,’ कँडेलले भने । 

२०७५ असोज १० गते नेकपाका सांसद अग्नीप्रसाद सापकोटाले कञ्चनपुरकी बालिका निर्मला पन्तको हत्यासँग जोडेर ‘नमिता सुनिता हत्याकाण्ड’को प्रसंग निकालेका थिए ।

‘३८ वर्ष अगाडि मेरै जिल्ला सिन्धुपाल्चोकका माधवराज भण्डारीका छोरी पोखरामा बलात्कृत भएका थिए, पोखरामा बलात्कार हुँदा देख्ने चूडामणि उपाध्याय वनपाले थिए । वनपालेले उनको आँखाले त्यो घटना देख्नु नै मृत्युको कारण बन्यो र उनलाई मारियो,’ सापकोटाले संसदमा भनेका थिए, ‘३८ वर्षपछि आउँदा पनि ती कुरा दोहोरिएरहेका छन् । त्यसैले मैले यहाँ हृदयभित्र ज्वालामुखी बिस्फोटन भएको कुरा र मानव सभ्यताको लज्जित हुने कुरालाई अलि गम्भीरतापूर्वक उठाउनुपर्छ भनेर बोलेको छु ।’

पञ्चायत कालमा पोखरामा भएको ‘नमिता सुमिता हत्याकाण्ड’लाई रहस्यमय घटनाको रुपमा लिने गरिन्छ । २०३८ जेठ २४ गते कास्कीको पोखरामा घटना भएको थियो ।

सिन्धुपाल्चोक ठोकर्पा स्थायी घर भइ काठमाडौंको लाजिम्पाटमा बस्दै आएका पर्यटन मन्त्रालयका पूर्व कायममुकायम सचिव माधव भण्डारीकी २ छोरी नमिता र सुनिताको हत्याको हालसम्म रहस्य पत्ता लाग्न सकेको छैन । उनीहरूको बलात्कारपछि हत्या भएको भन्दै तत्कालीन सरकारविरुद्ध चर्काे आन्दोलन भएको थियो । तर शक्तिशाली भनिएका अपराधी हालसम्म पत्ता लाग्न सकेका छैनन् ।

जनआस्था साप्ताहिकका सम्पादक किशोर श्रेष्ठले नमिता सुनीता हत्या काण्डको विषयमा पुस्तक प्रकाशित गरेका थिए । ‘दरबार काण्डपछि दबाइएको अर्काे हत्याकाण्ड’ नामक पुस्तक चर्चामा आएको थियो ।