यातायात व्यवस्था विभागमा सेवाग्राहीको गुनासो सुन्न सहायता कक्ष

प्रतिकात्मक तस्वीर

काठमाडौं– चालक अनुमतिपत्रसँग सम्बन्धित गुनासो दैनिक आइरहँदा यातायात व्यवस्था विभागले ‘सहायता कक्ष’को शुरू गरेको छ । 

चालक अनुमतिपत्रसँग सम्बन्धित जिज्ञासा लिएर दैनिक सेवाग्राही आइरहँदा कार्यालयमा सधैँ भीडभाड भइरहेकाले यो सेवा शुरू गरिएको विभागका निर्देशक प्रेमकुमार सिंहले बताए ।


Advertisement

उनका अनुसार दुई दिनपहिले शुरू भएको कक्षले अनुमतिपत्र अनलाइन आवेदन, छपाइ, वितरण लगायतका विषयमा सम्पूर्ण जानकारी दिइनेछ । 

सेवाग्राहीले अनुमतिपत्र छापियो वा छापिएन वा छापिएका अनुमतिपत्रमा पनि कुनै खालका समस्या आउँदा कोठाकोठामा पुगेर बुझ्न जान नपर्ने उनको भनाइ छ ।


Advertisement

उनले भने, 'यसअघि सेवाग्राहीले भोग्दै आउनुभएको समस्या हट्ने हामीले विश्वास गरेका छौं ।'

अहिले सहायता कक्षले चालक अनुमति पत्रसँग सम्बन्धित मात्रै जानकारी दिने भए पनि आगामी दिनमा यसको क्षेत्र विस्तार गर्दै जाने विभागको योजना रहेको सिंहले जानकारी दिए । 

सेवाग्राहीले आइतबारदेखि बिहीबारसम्म बिहान १०ः१५ देखि ४ः४५ सम्म र शुक्रबार २ः४५ बजेसम्म कार्यालयमा आएर वा फोन सम्पर्क गरेर अनुमतिपत्रबारे जानकारी लिन सक्ने बताइएको छ । 

देशभरका यातायात व्यवस्था कार्यालयहरुबाट सङ्कलन भएका आवेदनबाट विभागले चालक अनुमतिपत्र छपाइ गर्दै आएको छ ।

सम्बन्धित कार्यालयले नै चालक अनुमतिपत्र वितरण गरिरहे पनि समस्या आउँदा उनीहरुलाई विभागमा पठाउने गरेका छन् ।

गत वर्ष नै यातायात व्यवस्था कार्यालयहरु प्रदेशमा हस्तान्तरण भए पनि देशभरका चालक अनुमतिपत्र छपाइ विभागले नै गरिरहेको छ ।

कमेन्ट गर्नुहोस्