काठमाडौँ - सत्तारूढ दल नेपाल कम्युनिस्ट पार्टी (नेकपा)का अध्यक्ष पुष्पकमल दाहाल 'प्रचण्ड'ले चीनका राष्ट्रपति शी चिनफिङको विचारधारा विश्वव्यापी बहसको विषय बनेको बताएका छन् ।

सोमवार काठमाडौँमा आयोजित नेकपा र चिनियाँ कम्युनिस्ट पार्टी (सीसीपी)बीचको वैचारिक अन्तरक्रिया कार्यक्रममा बोल्दै अध्यक्ष प्रचण्डले चिनियाँ चरित्रको समाजवाद निर्माणका लागि शी-विचारधारा महत्त्वपूर्ण भएको दाबी गरे ।

'शी-विचारधारा विश्वव्यापी बहसको विषय बनेको छ,' प्रचण्डले भने, 'चीनको सरकारले जनताको सेवा गरेर शासनमा बस्ने वैधता पाएको छ । शासनमा बस्नेहरू विस्तारै जनताको सेवा गर्नुभन्दा सुख सुविधामा लागेमा कम्युनिस्टहरूको शासन गर्ने वैधता समाप्त हुन्छ ।'

नेपालले एक चीन नीतिको शब्दमा मात्र नभएर व्यवहारमै कार्यान्वयन गरिरहेको प्रचण्डले बताए ।

'एक चीन नीति शब्दमा मात्र नभएर व्यवहारमा पनि हामीले कार्यान्वयन गरिरहेका छौं,' प्रचण्डले भने ।

प्रचण्डले आफू प्रधानमन्त्री भएका बेलामा बीआरआईमा हस्ताक्षर भएको स्मरण गरे ।

'नेपालका लागि पूर्वाधार विकासको अपरिहार्य आवश्यकता बीआरआई हो,' उनले भने, 'म आफैं प्रधानमन्त्री रहेको बेला बीआरआईमा हस्ताक्षर भएको हो । दुई देशको सम्बन्ध अहिले नयाँ उचाईमा पुगेको छ ।'

प्रचण्डले चीनका तर्फबाट छिटै ऐतिहासिक र उच्चस्तरीय भ्रमण हुने विश्वास व्यक्त गरे ।

राजधानीमा चलिरहेको दुईदिने अन्तरसंवाद कार्यक्रमबाट दुवै देशले एक अर्काको अनुभवबाट सिक्ने र आ-आफ्नो विशेषता अनुसारको समाजवादका कार्यक्रमहरू लागू गर्न सहयोग गर्ने अपेक्षा आफूले लिएको प्रचण्डको भनाइ छ ।