माझी समुदायसँग मनाए चन्द्र भण्डारीले दशैँ

काठमाडौँ – प्रमुख प्रतिपक्षी दल नेपाली कांग्रेसका केन्द्रीय सदस्य चन्द्र भण्डारीले गुल्मीको माझी बस्तीमा गएर दशैँ मनाएका छन् । 

विगत ६ वर्षदेखि सीमान्तकृत समुदायसँग दशैं मनाउँदै आएका भण्डारीले यसपाली गुल्मी गाउँपालिकाको वडा नम्बर १ मा रहेको माझी बस्ती रोजेका हुन् । 


Advertisement

मंगलबार दशमीका दिन भण्डारीले माझी बस्तीमा बस्दै आइरहेकी ९० वर्षीय मनकुमारी बोटे माझीको हातबाट टिका लगाएर आशिर्वाद लिएका छन् । भण्डारी आफ्नो घरको टिकाटालो सकेर सिधै माझी बस्तीतर्फ सोझिएका थिए । 
माझी बस्तीमा बसोबास गरिरहेका करीब ५ सयलाइ टिका लगाएर भण्डारीले कपडा र शैक्षिक सामग्रीहरू वितरण गरे । 

विगत ६ वर्षदेखि सीमान्तकृत समुदायसँग दशैं मनाइरहेका कांग्रेस केन्द्रीय सदस्य भण्डारीले दशैंमा आफूले आयोजना गरेको कार्यक्रम नमूना कार्यक्रम रहेको बताए । 

बुधवार लोकान्तरसँग कुरा गर्दै भण्डारीले भने, ‘विगत ६ वर्षदेखि प्रत्येक दशैंमा मैले मेरै पहलमा यस्ता कार्यक्रमहरू आयोजना गर्ने गरेको छु । हिजो र आजको कार्यक्रम नेपाली कांग्रेसको जागरण अभियानअन्तर्गत पनि जोडिएको छ । यस्ता खालका नमूना कार्यक्रमहरूले हामीलाई सीमान्तकृत समुदायसँग जोड्न मदत गरेको छ ।’

दशैँको भोलिपल्ट एकादशीका दिन पनि भण्डारीले ३ ठाउँमा थप कार्यक्रम गरेको जानकारी दिए । ‘आज चाहिँ माझी मात्र नभएर अन्य समुदायमा पनि हामी पुग्यौं,’ उनले भने, ‘सत्यवती गाउँपालिकाको तीन ठाउँमा टिका लगाउने कार्यक्रम सम्पन्न भएको छ । ४ सय भन्दा बढी विद्यार्थीलाई हामीले स्कूल ब्याग लगायत अन्य स्टेसनरी बाँड्यौं ।’ 

यिनै कार्यक्रमहरूले गर्दा आफ्नो दशैं अरूको भन्दा विशेष उल्लासमय बनेको भण्डारीले दाबी गरे ।

कमेन्ट गर्नुहोस्