सरकारलाई बाबुरामको सुझाव– 'चीनबाट रेल ल्याउन ऋणजालमा नफसौं'

फाइल फोटो

काठमाडौं  समाजवादी पार्टीका संघीय परिषद् अध्यक्ष तथा पूर्व प्रधानमन्त्री डाक्टर बाबुराम भट्टराईले रेल बनाउँदा नेपाल ऋणजालमा नफस्ने गरी अघि बढ्नुपर्ने सुझाव सरकारलाई दिएका छन् ।

बिहीवार बिहान प्रधानमन्त्री निवास बालुवाटारमा पूर्व प्रधानमन्त्री र पूर्व परराष्ट्रमन्त्रीहरूबीच भएको बैठकमा नेपालले अनुदान र ऋणको सन्तुलन मिलाउनुपर्ने सुझाव दिएको बताएका हुन् ।


Advertisement

बैठक सकिएपछि भट्टराईले सामाजिक सञ्जाल ट्विटरमा आफूले दिएका सुझावहरू उल्लेख गरेका छन् । आफ्ना सुझावमा डाक्टर भट्टराईले नेपालले बीआरआई र इन्डोप्यासिफिक दुवैबाट लाभ लिने गरी अघि बढ्नुपर्ने बताएका छन् ।

'महामहिम चीनियाँ राष्ट्रपतिको आसन्न नेपाल भ्रमणको सन्दर्भमा सरकारले मागेअनुसार यस्तो सुझाव दिइयो,' भट्टराईले ट्वीट गरेका छन्, 'मुख्यत: चीन, भारत र अमेरिकाको नेपालमा बढ्दो चासोलाई अवसरका रूपमा लिने, तीनवटैसँग समानान्तर सम्बन्ध राख्ने, गतिशील शान्तिवाद/तटस्थताको नीति लिने, बीआरआई र इन्डोप्यासिफिक रणनीति दुवैबाट लाभ लिने ।'


Advertisement

भट्टराईले नेपाललाई चीन र भारतबीच आर्थिक सेतुका रूपमा विकास गर्नुपर्ने, चीनसँग रेल, सडक जोड्नमा जोड दिने, रेल बनाउँदा ऋणजालमा नफस्ने, अनुदान र ऋणको सन्तुलन मिलाउने, सडकमा बढी जोड दिने, कर्णाली-गण्डकी-कोशी कोरिडोरलाई प्राथमिकता दिने, ऋण अनुदान भन्दा बढी औद्योगित लगानी, व्यापार र पर्यटनमा जोड दिने जस्ता कामहरू सरकारले गर्नुपर्ने बताए ।

डाक्टर भट्टराईले चीनसँग तत्काल सुपुर्दगी सन्धि गर्न नहुने धारणा राखेका छन् । उनले यसअघि भारत र चीनबीच भएको लिपुलेक सम्झौता सच्याउनुपर्ने र त्यसमा नेपालको सहभागिता सुनिश्चित गर्नुपर्ने सुझाव सरकारलाई दिए । त्यसबाहेक नेपाल–चीन मैत्री सन्धी अद्यावधिक गर्ने चीनको प्रस्तावलाई दुवै देशको हितमा संशोधन गर्नुपर्ने भट्टराईको सुझाव छ ।

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्