डेढ वर्षदेखि कार्यालय सहयोगीको भर, सेवाग्राहीलाई हाकिम खोज्दै हिँड्नुपर्ने बाध्यता !

लखन चाैधरी
लखन चाैधरी

लखन चौधरी लोकान्तरका लागि सुदूरपश्चिम प्रदेश प्रतिनिधि हुन् । 

धनगढी – सुदूरपश्चिम प्रदेशमा पत्रपत्रिका तथा सञ्चार माध्यमको अभिलेख राख्ने तथा सञ्चारकर्मीहरूलाई प्रेस पास उपलब्ध गराउने सञ्चार केन्द्र धनगढीको कार्यालय डेढ वर्षदेखि अस्तव्यस्त बनेको छ ।

सञ्चार तथा सूचना प्रविधि मन्त्रालयको सूचना तथा प्रसारण विभाग मातहतको सञ्चार केन्द्र धनगढीको कार्यालय डेढ वर्षदेखि अस्तव्यस्त हुँदै आएको छ । 


Advertisement

तत्कालीन कार्यालय प्रमुख कृष्णामाया श्रेष्ठको डेढ वर्ष पहिले अवकाश भएयता कार्यालय प्रमुखविहीन बनेको छ । हाल सो कार्यालयको कार्यबाहकको जिम्मेवारी जिल्ला हुलाक कार्यालय कैलालीका प्रमुख मेनका श्रेष्ठले पाएकी छिन् ।

जिल्ला हुलाक कार्यालयकी प्रमुख श्रेष्ठ हुलाक कार्यालयमा मात्रै सीमित भएपछि दैनिक कामकाज प्रभावित बनेको हो । सञ्चार केन्द्र कार्यालय सहयोगी विनोद चौधरीको भरमा चल्दै आएको छ ।

कार्यालय सहयोगी चौधरी भन्छन्– ‘यहाँ यस्तै छ । हाकिम नभएको धेरै भयो । हुलाक कार्यालयको हाकिमसा‘बले हेरेपनि उहाँ उताकै व्यस्तताले यता भ्याउन सक्नुहुन्न । सबै चिठ्ठीपत्रमा हस्ताक्षर गराउन उतै जानुपर्छ । यो कार्यालय पनि हुलाकमै सर्दैछ भन्ने सुन्छु, अहिलेसम्म सरेको छैन ।’

कार्यालय प्रमुखविहीन बनेपछि सो कार्यालय कवाडखानामा जस्तो बनेको छ । पत्रपत्रिकाहरू यत्रतत्र फिँजिएका देख्न सकिन्छ भने कार्यालय प्रमुखको कार्यकक्ष नै सधैँ बन्द अवस्थामा रहने कार्यालय सहयोगी चौधरी बताउँछन् ।

कार्यालय प्रमुख कार्यालयमा नबसेपछि प्रेसपास नवीकरण गराउन जाने सुदूरपश्चिमका पत्रकारहरू निकै सास्ती समेत झेल्दै आएका छन् । पहुरा थारू दैनिकमा कार्यरत पत्रकार दुर्जन चौधरी भन्छन्–‘प्रेसपास नवीकरण गराउन जाँदा आफैं प्रेसपासको फम्र्याटमा टाइप गर्नुपर्ने, टाइप गरिएको प्रेसपासमा हस्ताक्षर गराउन आफैं हुलाक कार्यालय धाउनुपर्ने अवस्था छ ।’

त्यस्तै, कार्यबाहक कार्यालय प्रमुख श्रेष्ठले सूचना तथा प्रसारण विभागले आवश्यक कर्मचारी नपठाउँदा समस्या सिर्जना भएको बताइन् । आफूले कार्यालय सञ्चालनमा केही सहयोग मात्रै गरेको बताउँदै उनले आफ्नो व्यस्तता हुलाक कार्यालयमा ठिक्क हुने भएकोले समय दिन नसकिरहेको उल्लेख गरिन् ।

सूचना विभागबाट जारी भएको प्रेसपास नवीकरण, प्रेस काउन्सिलको वर्गीकरणमा परेका पत्रिकालाई भुक्तानी दिने, पत्रिकाको अभिलेख राख्ने र सिफारिस गर्ने कार्य यस कार्यालयबाट हुँदै आएको छ ।

 

कमेन्ट गर्नुहोस्