काठमाडौं – पृथ्वीको सबभन्दा गर्मी देशमध्ये एक कतारले चिसोका लागि घरबाहिर सडकमै एयर कन्डिसनर लगाएको छ अनि सडकहरू नीलो रंगमा रंगाएको छ । 

गर्मीमा कतारको तापक्रम ४६ डिग्री सेल्सियससम्म पुग्छ । कतारमा सन् २०२२ मा हुन लागेको फूटबल विश्वकप गर्मीकै कारण जाडो महिनामा आयोजना गर्न लागिएको छ । 

पोहोर सालदेखि कतारले फूटबल रंगशालामा खेलाडी र समर्थकहरूलाई शीतल बनाउनका लागि एयर कन्डिसन उपयोग गर्न थालेको छ । 

अहिले सडकपेटीहरूमा विशाल कूलरहरू जडान गरिएको छ । मानिसहरूलाई दैनिक जीवन बिताउन सहज होस् भनेर कूलर लगाइएको हो । 

राजधानी दोहामा अब्दुल्लाह बिन जस्सिम सडकमा नीलो रंग पोतिएको छ । त्यसो गर्दा सडकको तापक्रम अलिकता पनि भए पनि घट्छ । 

कालोपत्रे गरिएको सडकले सूर्यको ताप बढी सोस्छ भने नीलो रंगले ताप परावर्तन गर्छ । 

संसारका अन्य शहरमा पनि अत्यधिक गर्मीबाट मुक्ति पाउन यस्तै किसिमका परीक्षणहरू गरिएका छन् ।

एजेन्सी