प्रधानमन्त्री ओली भन्छन्– पहिले गीतमा देखाउँथ्यो, ४२ महिनामा त यताबाट छिरेर उता निस्किन्छ !

काठमाडौं – प्रधानमन्त्री केपी शर्मा ओलीले नेपालको सडक यातायात नयाँ युगमा प्रवेश गरेको जिकिर गरेका छन् ।

नागढुंगा–सिस्नेखोला सुरुङमार्गको सोमवार शिलान्यास गर्दै प्रधानमन्त्री ओलीले यस्तो जिकर गरेका हुन् । 


Advertisement

पहिलापहिला गीतमा देखिने कुरा ४२ महिनापछि वास्तविकतामा देखिने उनको जिकिर छ ।

'पहिला–पहिला गीतमा काठमाडौंबाट यसो छिरेर उता हेटौंडा निस्केको देखाउँथ्यो,' प्रधानमन्त्री ओलीले भने, 'अब यता (नागढुंगा)बाट छिरेर उता (नौबीसे) निस्केको त ४२ महिनामा भइहाल्छ।'

टोखा–छहरे, बेत्रावती–स्याफ्रुबेसी सुरुङमार्ग पनि अध्ययनको चरणमा रहेको प्रधानमन्त्री ओलीले बताए ।

काठमाडौंको चन्द्रागिरि नगरपालिका–१ टोटेपाखामा सोमवार विशेष कार्यक्रमका बीच प्रधानमन्त्री ओलीले सुरुङमार्ग शिलान्यास गरेका हुन् ।

आयोजना ४२ महिनाभित्र निर्माण सम्पन्न गर्ने लक्ष्य छ । 

जापान अन्तर्राष्ट्रिय सहयोग नियोग (जाइक) को ०.०१ प्रतिशत सहुलियत ऋण सहयोगमा साढे २ वर्ष अघिदेखि सुरुङमार्ग निर्माण प्रक्रिया शुरू भएको थियो ।

यसका लागि २२ अर्ब लाग्नेमा जाइकाले १६ अर्ब सहुलियत ऋण उपलब्ध गराउने छ भने नेपाल सरकारले आन्तरिक स्रोतबाट ६ अर्ब परिचालन गर्ने नागढुंगा सुरुङमार्ग निर्माण आयोजनाले जनाएको छ ।

प्रवेश मार्गसहित ५.५६ किमी सुरुङमार्ग निर्माणले नेपालको पूर्वाधार विकासमा महत्वपूर्ण योगदान पुग्ने  विश्वास गरिएको आयोजनाका निर्देशक श्यामप्रसाद खरेलले बताए ।

उनका अनुसार आयोजना प्रभावित क्षेत्रमा मुआब्जा वितरणमै करीब ६ अर्ब खर्च हुनेछ ।

काठमाडौंको चन्द्रागिरि नगरपालिका–१, ३ र ५ का पीडितलाई मुआब्जा वितरण भइरहेको र हालसम्म मुआब्जा वितरणको ८५ प्रतिशत काम सम्पन्न भएको उनले बताए । 

धादिङको धुनिवेशी नगरपालिका–९ का प्रभावितलाई मुआब्जा दिने निर्णय भइसकेको हुँदा छिटो वितरण प्रक्रिया पनि शुरू गरिने आयोजनाले जनाएको छ ।

यसअघि जलविद्युत् र खानेपानी आयोजनाका लागि सुरुङ निर्माण भएपनि यातायात नै सञ्चालन हुनेगरी पहिलोपटक सुरुङमार्ग निर्माण हुन लागेको हो ।

उक्त मार्गमा दुईवटा साना ‘फ्लाई ओभर’समेत निर्माण गरिने आयोजना निर्देशक खरेलले बताए ।

सुरुङमार्गकै मुखमा र सतुंगलमा ‘फ्लाई ओभर’ बनाउन लागिएको छ । सडक पूर्वाधारमा यहाँ निर्माण हुन लागेको ‘फ्लाई ओभर’ पनि नेपालकै पहिलो हो ।

सुरुङमार्गका लागि असोज ६ गते जापानस्थित  हाजमा आङदो कर्पोरेशनसँग सम्झौता भएको थियो । 

सुरुङमार्गलाई जोड्न ३ किलोमिटर प्रवेश मार्गसमेत निर्माण हुनेछ । 

सोही परियोजनाअन्तर्गत स्थानीय उत्पादन संकलन केन्द्र (सर्भिस सेन्टर) समेत निर्माण हुने आयोजनाले जनाएको छ ।

कमेन्ट गर्नुहोस्