हिमालयन क्यापिटल लिमिटेडको कारोवार शुरू

काठमाडौँ - हिमालयन बैंक लिमिटेडले आफ्नो सहायक कम्पनी हिमालयन क्यापिटल लिमिटेडको कारोवार शुक्रवारबाट शुभारम्भ गरेको छ ।

बैंकका अध्यक्ष मनोज बहादुर श्रेष्ठले एक समारोहका बीच हिमालयन क्यापिटल लिमिटेडको समुद्घाटन गर्दै औपचारिक रुपमा सेवा प्रारम्भ गरेको घोषणा गरे ।


Advertisement

बैंकको पूर्ण स्वामित्व रहेको हिमालयन क्यापिटलको मुख्य उद्देश्य ग्राहकहरुका लागि मर्चेन्ट बैंकिंग तथा इन्भेस्टमेन्ट बैंकिंग सेवा प्रदान गर्नु रहेको छ । क्यापिटलको चुक्ता पूँजी २० करोड रहेको छ ।

नेपाल धितोपत्र बोर्डले हिमालयन क्यापिटललाई गत साउन २६ गते सम्पूर्ण मर्चेन्ट बैंकिङ कारोबार गर्न इजाजत प्रदान गरेको थियो ।

मर्चेन्ट बैंकिङ कारोवारअन्तर्गत हिमालयन क्यापिटल लिमिटेडले धितोपत्र निष्कासन, शेयर रजिष्ट्रार,  धितोपत्र प्रत्याभूति, लगानी व्यवस्थापन, संस्थागत परामर्श सेवा, र डीपी सेवा प्रदान गर्नेछ । उद्घाटन समारोहमा हिमालयन बैंकका अध्यक्ष श्रेष्ठले पूँजी बजारमा आएका सकारात्मक परिवर्तन र बजारको दायरामा भएको वृद्धिलाई आत्मसाथ गर्दै ग्राहकको सेवामा कम्पनी पूर्णरूपमा समर्पित हुने बताए ।

हिमालयन क्यापिटलको संचालक समितिका अध्यक्ष तथा हिमालयन बैंकका महाप्रबन्धक सुशील जोशीले ग्राहकहरुलाई आधुनिक मर्चेन्ट बैंकिङ सेवाहरु उपलब्ध गराउने र देशको अर्थतन्त्रको दिगो विकासमा योगदान पुर्याउने प्रतिबद्धता जाहेर गर्दै निकट भविष्यमा नै नियामक निकायको स्वीकृति पश्चात क्यापिटलले हिमालयन बैंकको सामुहिक लगानी कोष 'हिमालयन म्युच्युअल फण्ड' तथा अन्य लगानी कोषहरुको संचालन गरी ग्राहकलाई विशिष्टीकृत सेवा प्रदान गर्ने लक्ष्य राखेको जानकारी गराए ।

क्यापिटलका प्रमुख कार्यकारी अधिकृत परमेश्वर पन्तले कम्पनीले ग्राहकहरुको सन्तुष्टिलाई आत्मसाथ गर्दै सम्पूर्ण धितोपत्र बजारलाई सकारात्मक योगदान दिन कटिबद्ध रहने उल्लेख गरे ।

हिमालयन क्यापिटल लिमिटेडको संचालक समितिमा हिमालयन बैंक लिमिटेडको तर्फबाट सुशील जोशी, अध्यक्ष र संचालकहरुमा सुनिल गोर्खाली र  सतिशराज जोशी रहेका छन् । क्यापिटलको प्रधान कार्यालय ठमेलस्थित कर्मचारी संचय कोष भवनमा रहेको छ ।

क्यापिटलको उद्घाटन समारोहमा हिमालयन बैंक लिमिटेडको संचालक समितिका सदस्य, बैंकका प्रमुख कार्यकारी अधिकृत अशोक समशेर जबरा, हिमालयन क्यापिटल लिमिटेडको संचालक समितिको साथै बैंकका महाप्रबन्धक तथा वरिष्ठ कर्मचारी, क्यापिटलका कर्मचारी, नियामक निकाय तथा विभिन्न संघ संस्थाका पदाधिकारी, र संचारकर्मीको उपस्थिति रहेको थियो ।

 

कमेन्ट गर्नुहोस्