काठमाडौं – नेपाल राष्ट्र बैंकका डेपुटी गभर्नर शिवराज श्रेष्ठको विषयमा छलफल गर्न राष्ट्र बैंक सञ्चालक समितिको बैठक आइतवार बस्न लागेको छ । 

वित्तीय स्थायीत्वमा गम्भिर असर पर्ने काम गरेको आरोप लागेपछि राष्ट्र बैंकको आज बस्न लागेको बोर्ड बैठकले उनलाई बर्खास्ती गर्ने या नगर्नेभन्नेबारे निर्णय गर्ने छ । 

राष्ट्र बैंकको बोर्ड बैठक बस्ने निर्णय भने गत बिहीवार नै भएको थियो । अर्थ मन्त्रालयबाट चिठी आइसकेकाले आइतवारका लागि बोर्ड बैठक राखिएको बैंकका एक उच्च अधिकारीले जानकारी दिए ।

डेपुटी गभर्नर श्रेष्ठलाई खराब कर्जा लुकाउन सहयोग गरेको, सर्वोच्च अदालतले फैसना नगर्दै विदेशबाट ल्याएको पैसा निकाल्न सहयोग गरेको तथा एनसेलको कर छलीमा सहयोग गरेको आरोप लागेको छ । यस्तै, उनीमाथि सम्पत्ति शुद्धिकरण निवारणसम्बन्धी सूचना संकलन गर्न प्रयोग गरिने सफ्टवेयर चल्न नदिन भूमिका खेलेको आरोप पनि लागेको छ । 

‘बैंकहरूको मर्जर तथा अन्य समसामयीक विषयमा छलफल गर्न बैठक डाकिएको थियो, त्यसमा मेरै विषयमा पनि कुरा चल्छ,’ राष्ट्र बैंकका डेपुटी गभर्नर श्रेष्ठले लोकान्तरलाई बताए ।

के छ ऐनमा ?

डेपुटी गभर्नर श्रेष्ठलाई वित्तीय स्थायीत्वमा गम्भिर असर पर्ने काम गरेको आरोप लागेको छ । मन्त्रिपरिषदको बैठकले श्रेष्ठलाई कारबाही गर्न का लागि राष्ट्र बैंकलाई पत्र काटिसकेको छ । 

मन्त्रिपरिषद्को पत्र राष्ट्र बैंकमा पुगिसकेको छ । राष्ट्र बैंकले उनीमाथि लागेको आरोपबारे छानबिनका लागि समिति गठन गर्ने तयारी गरेको छ । स्रोतका अनुसार उनीमाथि समितिले आजैबाट छानबिन गर्नेछ ।  डेपुटी गभर्नरविरुद्ध छानबिन हुनेबितिकै उनी पदबाट स्वतः निलम्बन भएको मानिनेछ ।

राष्ट्र बैंकको ऐनको दफा २२ मा डेपुटी गभर्नर तथा सञ्चालकहरू पदमुक्त हुने व्यवस्था नै राखिएको छ । उक्त दफा अनुसार सरकारले सञ्चालक तथा डेपुटी गर्भनरहरूको पदमुक्त गर्न सक्ने व्यवस्था रहेको छ । यसका लागि सफाईको मौका भने दिनुपर्ने उल्लेख गरिएको छ ।

यदि उनीबाट चित्तबुझ्दो जवाफ नआएमा सञ्चालक समितिले सरकारलाई पदमुक्त गर्न सिफारिस गर्छ र सरकारले पदमुक्त भएको घोषणा गर्दछ ।

आगामी चैतमा वर्तमान गर्भनर चिरञ्जीवी नेपाल गभर्नरबाट पदमुक्त हुँदैछन् । त्यसपछिको गभर्नर बन्नका लागि अहिलेदेखि नै  दौडधुप चलिरहेको छ । 

डेपुटी गर्भनर श्रेष्ठले गभर्नरको लाइनबाट हटाउनका लागि आफूविरुद्ध चलखेल भएको दावी गरे । लोकान्तरसँगको कुराकानीमा श्रेष्ठले राजनैतिक आस्थाका आधारमा आफूविरुद्ध षड्यन्त्र रचेको समेत बताए । उनी भन्छन्, ‘म काँग्रेस निकट भएकाले सरकारले नै ममाथि षड्यन्त्र रचेको होकी जस्तो लाग्छ ।’