नेपाली एटीएमबाट पैसा लुट्ने चिनियाँ ह्याकर जेल चलान

फाइल फोटो

काठमाडौं– दरबारमार्गस्थित नबिल बैंकको एटीएमबाट पैसा चोरी गर्दैगर्दा पक्राउ परेका चिनियाँ ह्याकरहरू पुर्पक्षका लागि जेल चलान भएका छन् ।

उच्च अदालत पाटनको वाणिज्य इजलासले पक्राउ परेका ६ चिनियाँ नागरिकलाई पुर्पक्षका लागि थुनामा राख्न आदेश दिएको महानगरीय प्रहरी परिसरका प्रमुख उत्तमराज सुवेदीले बताए ।


Advertisement

चिनियाँ नागरिक लिन जियानमेङ, लुओ जियालेइ, झु लियानग्याङ, क्वी युनकिङ, चेन बिनबिन र फ्रेन्च नागरिक सु–लुसिङलाई थुनामा पठाएको सुवेदीले बताए ।

पाटन उच्च अदालतले चिनियाँ ह्याकरलाई सहयोग गरेको आरोप लागेका ठमेल स्थित डिस्को र नेपालय मनी एक्सचेञ्जका देवनाथ लामिछाने, रोशन प्रधान र रेवती दवाडीलाई २६/२६ लाख धरौटीमा रिहा गरेर मुद्दाको पुर्पक्ष गर्न आदेश दिएको छ ।

पक्राउ परेका चिनियाँ नागरिकको साथबाट १ करोड २६ लाख २९ हजार ४५ नेपाली रुपैयाँ, ९ हजार १ सय ८ अमेरिकी डलर, १ हजार १ सय ९१ चिनियाँ युवान, २ सय ५० यूरो, ५ हजार क्याम्बोडिन मुद्रा र ८० हङकङ डलर फेला परेको थियो । 

नक्कली एटीएम कार्ड १ सय ३२ थान, सक्कली एटीएम कार्ड १८ थान, कार्ड प्रिन्टर मेसिन १ थान, ल्यापटप, सामसुङ मोबाइल र डाटा कार्ड १/१ थान प्रहरीले बरामद गरेको थियो । 

नेपाल राष्ट्र बैंकले १ करोड ६७ लाख रुपैयाँ ह्याक गरी चोरी भएको जनाएको थियो ।
 

कमेन्ट गर्नुहोस्