उत्तर कोरियाले जापानका प्रधानमन्त्रीलाई गर्‍यो तथानाम गाली, भ्रमणको अनुमति नदिने बतायो

काठमाडौं – उत्तर कोरियाले जापानका प्रधानमन्त्री शिन्जो आबेलाई ‘मूर्ख र खलनायक’ भन्दै उनलाई प्योङयाङमा पाइला पार्न नदिने बताएको छ । 

उत्तर कोरियाले गरेको हतियार परीक्षणको आबेले आलोचना गरेपछि उनलाई अपमान गर्दै उत्तरको मिडियामा टिप्पणी आएको हो । 


Advertisement

उत्तर कोरियाले गत बिहीवार विशाल रकेट लोन्चरहरू परीक्षण गरेको बताएको थियो । तर जापानले त्यो ब्यालिस्टिक क्षेप्यास्त्र भएको हुन सक्ने बतायो । 

आबेले यसै हप्ता भएको एसियाली शिखर सम्मेलनमा उत्तर कोरियाको हतियार परीक्षणको भर्त्सना गर्दै आफू उत्तरका नेता किम जोङ–उनसँग निःशर्त भेट्न उत्सुक रहेको बताएका थिए । 


Advertisement

‘आबे मूर्ख र खलनायक हुन् । जापानमा आणविक हतियार खसाइएको जस्तो होहल्ला उनले गरिरहेका छन् र हामीले गरेको रकेट लोन्चर परीक्षणमाथि आपत्ति उठाएका छन्,’ उत्तरको समाचार संस्था केसीएनएले लेख्यो । 

‘आबेलाई प्योङयाङको भूमिमा पाइला टेक्ने सपना नदेख्न सल्लाह दिइन्छ किनकि उनले उत्तर कोरियाको आत्मरक्षाका लागि गरिएको हतियार परीक्षणको निन्दा गरे,’ टिप्पणीमा लेखिएको छ ।

आबेले उत्तर कोरियाद्वारा अपहृत जापानी नागरिकहरूको मुद्दा टुंग्याउने आशा गरेको भए पनि यो टिप्पणीले त्यसलाई चकनाचुर पारेको छ । आबेले सबै जापानीलाई देश फिर्ता ल्याउने प्रतिज्ञा गरेका छन् र किमसँग निःशर्त भेट्न चाहेको बताएका छन् ।

रोयटर्सबाट
 

कमेन्ट गर्नुहोस्