दुईजना विपक्षी कार्यकर्ता मारिएपछि बोलिभियाकी मेयरलाई रातो रंग खन्याएर कपाल मुण्ड्याइयो (भिडियो)

काठमाडौं – बोलिभियाको एक शहरकी मेयरलाई रातो रंगमा डुबाएर कपाल मुण्ड्याइएको छ । विपक्षी दलका दुई कार्यकर्ताको हत्यामा उनी दोषी रहेको आरोप लगाउँदै विरोधकर्ताहरूले दुर्व्यवहार गरेका हुन् । 

सत्तारूढ मास पार्टीकी मेयर पेट्रिसिया आर्सलाई बुधवार भिन्टो टाउन हलबाट घिसारेर बाहिर निकालियो र चार घन्टासम्म अपमान सहन बाध्य बनाइयो । उनलाई घुँडा मारेर बस्न र राजीनामापत्र लेख्न समेत लगाइयो । 


Advertisement

लट्ठी बोकेका अनि मुकुण्डो लगाएका युवाहरूले ‘हत्यारा, हत्यारा’ भन्दै नारा लगाए अनि आर्सलाई एक मञ्चमा लगेर कपाल काटिदिए । 

अक्टोबर २० मा राष्ट्रपति इभो मोरालेसले चुनाव जितेदेखि बोलिभियामा खतरनाक विरोध प्रदर्शन भइरहेका छन् । निर्वाचनमा धाँधली गरिएको आरोप विपक्षीहरूले लगाएका छन् । 

बुधवार दंगाबाजहरूले भिन्टो जाने बाटोको पुलमा अवरोध गरिरहँदा छिमेकी शहरमा दुईजना विरोधकर्ताहरू मारिएको हल्ला फैलियो । 

पछि कोचाबाम्बा शहरमा २० वर्षीय एक विद्यार्थी सरकारपक्षीय र सरकारविरोधीबीचको भिडन्तमा मारिएको पुष्टि भयो । 

त्यसपछि आक्रोशित भीड टाउन हल पुग्यो र आर्समाथि हत्याको आरोप लगायो । 

उनलाई घुँडा मारेर बस्न लगाइयो अनि राजीनामापत्रमा हस्ताक्षर गर्न समेत भनियो । 

क्षेत्रीय प्रहरी कमान्डर वाल्टर एल्भिसले उनलाई भ्यानमा राखेर उद्धार गरे । भ्यान दौडिँदा त्यसमा लगातार ढुंगा प्रहार गरिएको बताइएको छ ।

एजेन्सी 

कमेन्ट गर्नुहोस्