धर्मार्थ अस्पतालबाट चौबिसै घण्टा सेवा

प्रतिकात्मक तस्वीर

दमौली – जिल्लाको देवघाट गाउँपालिका–५ मा सञ्चालित धर्मार्थ अस्पतालबाट चौबिसै घण्टा सेवा सञ्चालन गरिएको छ ।

दिवा सेवा मात्रै सञ्चालन हुँदै आएको उक्त अस्पतालमा आइतवारबाट चौबिसै घण्टा सेवा सञ्चालन गरिएको हो ।


Advertisement

गलेश्वर आश्रमले विक्रम संवत् २०५७ देखि सञ्चालन गर्दै आएको उक्त अस्पताल गत वर्ष साउन १ गते देवघाट गाउँपालिकालाई हस्तान्तरण भएको थियो । आश्रममा रहेका ज्येष्ठ नागरिक, बालबालिका, तीर्थयात्री तथा स्थानीय समुदायलाई दिवा सेवा प्रवाह गर्दै आइरहेको अस्पतालबाट अब चौबिसै घण्टा सेवा सञ्चालन गरिने अस्पतालका प्रमुख प्रदीप बुढाथोकीले जानकारी दिए ।


Advertisement

बुढाथोकीका अनुसार आइतवारबाटै अस्पतालमा प्रयोगशाला सेवा पनि शुरू भएको छ । प्रयोगशाला सेवा शुरू भएसँगै इसिजी, भिडियो एक्स–रे गर्न सर्वसाधारणलाई चितवन जान नपर्ने भएको छ । ‘गाउँपालिकालाई अस्पताल हस्तान्तरण भएको एक वर्षसम्म दिउँसोमा मात्रै सेवा सञ्चालन थियो,’ बुढाथोकीले भने, ‘अब भने चौबिसै घण्टा सेवा प्रवाह गर्नेछौं ।’

अस्पतालले चितवनस्थित मेडिकल कलेजसँग प्राविधिक सहयोगका लागि सम्झौता गरेको छ । सम्झौता बमोजिम मेडिकल कलेजका १ जना एमबीबीएस डाक्टरले अस्पतालमा सर्वसाधारणको स्वास्थ्य परीक्षण गर्नेछन् ।
बुढाथोकीका अनुसार अस्पतालले विक्रम संवत् २०८२ सालसम्म मेडिकल कलेजसँग प्राविधिक सहयोगका लागि सम्झौता गरेको छ । 

अस्पतालमा ८ स्वास्थ्यकर्मी छन् । दरबन्दी थप्न मन्त्रालयमा माग गरिएको छ । अस्पतालबाट हाल दैनिक औसत ४५ जनाले स्वास्थ्य सेवा लिइरहेका छन् । गाउँपालिकाका अध्यक्ष दुर्गबहादुर थापाले अस्पताललाई सुविधायुक्त बनाउन पहल भइरहेको जानकारी दिए ।

थापाका अनुसार १५ श्ययाको अस्पताललाई स्तरोन्नति गरी २५ श्ययाको बनाउन पहल भइरहेको छ । १० रोपनी क्षेत्रफलमा फैलिएको उक्त अस्पतालसँगै जग्गा, यसका अन्य भौतिक संरचनाहरू र सबै चलअचल सम्पत्ति गत वर्ष गाउँपालिका मातहत आएको थियो ।

कमेन्ट गर्नुहोस्