काठमाडौं – लगातार ओरालो लाग्दै आएको धितोपत्र बजारमा शेयर कारोबार मापक नेप्से परिसूचक सोमवार भने दोहोरो अंकले बढेको छ । 

नेपाल स्टक एक्सचेन्जका अनुसार नेप्से परिसूचक १३.७७ विन्दुले बढेर १ हजार १४५.५७ विन्दुमा पुगेको छ । धेरैपछि बजारमा उच्च अंकको वृद्धि भएको हो । सेन्सेटिभ परिसूचक पनि ३.२८ विन्दुले बढेर २५२.२९ विन्दुमा पुगेको छ । 

नेप्से उकालो लागेसँगै कारोबार रकममा समेत वृद्धि भएको छ । कूल १७५ कम्पनीको १९ लाख ९५ हजार ४८ कित्ता शेयर ५४ करोड ९९ लाख ९८ हजार २४१ रुपैयाँ मूल्यमा खरीद बिक्री भए । 

स्टकका अनुसार कारोवार भएका कूल ११ उपसमूहमध्ये सोमवार अन्य उपसमूहको मात्रै शेयर घटेको छ । सो उपसमूहको शेयर ०.६ विन्दुले घटेको छ । बैंकिङ १२.३१, होटल ३१.९३, विकास बैंक १३.३२, जलविद्युत् १२.८५, वित्त २.०७, निर्जीवन बीमा ६७.५३, उत्पादन ५५.७१, लघुवित्त ३०.७५, जीवन बीमा ७९.०२ र सामूहिक लगानी कोष ०.०१ बिन्दुले बढेको छ ।

स्टकका अनुसार कारोबारका आधारमा एनएमबी बैंक शीर्षस्थानमा रहेको छ । बैंकको १३ करोड ९२ लाख १० हजार १९५ रुपैयाँ मूल्यमा शेयर खरीद–बिक्री भई शीर्षस्थानमा रह्यो । प्रभू बैंक ७ करोड ३३ लाख ६८ हजार ३०२ रुपैयाँ, माछापुच्छ्रे बैंक ३ करोड ५९ लाख ३८ हजार ३०७ रुपैयाँ, प्रभू बैंकको संस्थापक शेयर ३ करोड २१ लाख ३३ हजार २४ रुपैयाँ, प्राइम बैंक २ करोड १३ लाख ३ हजार ५८८ रुपैयाँ र नेपाल बैंकको १ करोड ७६ लाख ६३ हजार ५३० रुपैयाँ मूल्यमा खरीद–बिक्री भई शीर्ष स्थानमा रहे । 

स्टकका अनुसार हिमालयन डिस्टिलरीका शेयर धनीले ९.९७ प्रतिशतले कमाए । सबैको लघुवित्त वित्तीय संस्था ९.८९, रिडी हाइड्रोपावर ९.७२, आँखु खोला जलविद्युत् कम्पनी ९.४३, राधी विद्युत् कम्पनी ९.०२ र एनएमबी बैंकका शेयरधनीले ७.५८ प्रतिशतले कमाए । 

एनआईबीएल समृद्धि फन्ड ५.७७, खानीखोला जलविद्युत् कम्पनी ३.५७, सिटी एक्सप्रेस फाइनान्स १.९६, हिमालयन ऊर्जा विकास कम्पनी १.९४ र मेगा बैंकको संस्थापक शेयरका लगानीकर्ताले १.९२ प्रतिशतले गुमाए ।