महोत्तरीको पिपरा गाउँपालिकामा मंसिर १४ गते हुन गइरहेको उपनिर्वाचनमा दाजुभाइ दुई मोर्चामा उभिएका छन् ।

गाउँपालिका अध्यक्षमा कांग्रेसका तर्फबाट उम्मेदवार बनेका विजयकुमार यादवका दाजु हरिनारायण यादव संघीय समाजवादी पार्टीका उम्मेदवार रामजानकी यादवलाई जिताउन कम्मर कसेर लागेका छन् ।

पिपरा– ५ का स्थायी वासिन्दा हरिनारायण संघीय समाजवादी पार्टीका केन्द्रीय सदस्य हुन् । उनी पूर्व कृषिमन्त्री समेत हुन् ।

कांग्रेस उम्मेदवार विजय पार्टीका जिल्ला सभापति महेन्द्रकुमार राय, महाधिवेशन प्रतिनिधि बजरंग नेपालीसहित गाउँका अन्य नेता तथा कार्यकर्तासहित निर्वाचन कार्यालयमा पुगेका थिए । तर उनको आफ्नै दाजु हरिनारायण समाजवादी पार्टीबाट अध्यक्ष पदका उम्मेदवार रामजानकी यादवको उम्मेदवारी दर्ता गराउन पुगेका थिए ।

आफ्नो भाइका प्रतिस्पर्धी रामजानकीलाई जिताउन हरिनारायण दिलोज्यान दिएर लागि परेका छन् ।

‘अब कांग्रेस र नेकपाले मधेशको कल्याण गर्न सक्दैनन्, हाम्रै उम्मेदवार रामजानकी यादवले चुनाव जित्छन्,’ लोकान्तरसँग उनले भने, ‘मेरो भाइ विजयले पनि जित्ने कुनै आधार छैन ।’

आगामी दिनमा संसदीय क्षेत्रको राजनीति पनि गर्नुपर्ने भएकाले समाजवादी पार्टीका उम्मेदवारलाई नै भोट दिन उनको आग्रह छ ।

भाइ विजय भने समाजवादी र राजपा नेपालजस्ता मधेशवादी पार्टीले सत्ता सञ्चालन गरेर मधेशको मुद्दा ओझेलमा पारेकोले जनताले अब नपत्याउने विश्वासमा छन् । आफ्नै दाजु प्रतिस्पर्धी उम्मेदवारको प्रचारमा लागेको भन्दा चिन्ता उनलाई दाजुको पार्टीबाट सत्ता र शक्तिको दुरूपयोग हुन्छ कि भन्नेमा छ ।

‘केन्द्रमा र प्रदेश दुवै तहमा समाजवादी पार्टी सत्तामा रहेकाले सत्ताको दुरूपयोग गरेर चुनावलाई दाजु हरिनारायण यादवले प्रभावित गर्न सक्नेछन्,’ अध्यक्ष पदका उम्मेदवार यादवले भने, ‘निर्वाचन आयोगले निर्वाचन आचारसंहितालाई पूर्णरूपमा पालना गराउनुपर्नेतर्फ सजग हुनु आवश्यक छ ।’

कांग्रेस उम्मेदवार रहेका यादव विगतमा आफ्नो गाउँ सहोरवाको गाउँ विकास समितिको अध्यक्ष समेत भइसकेका छन् । पिपरा गाउँपालिकामा भ्रष्टाचार बढेको, कुशासन कायम भएको, कमिसनतन्त्र हावी भएको कारण ती सबै बेथिति हटाउन आफूले उम्मेदवारी दिएको उनको जिकिर छ ।

गाउँघरमा केही गल्लीमा सडक ढलान गरिएको भएपनि गुणस्तरहीन काम बढेको तथा त्यस्ता काममा भ्रष्टाचार बढी भएकाले आफ्नो उम्मेदवारी ती सबै समस्या हटाउनका लागि भएको उनी बताउँछन् ।
उता दाजु हरिनारायणको जिकिर अर्कै छ । उनी आफ्नो उम्मेदवारले जुनसुकै हालतमा पनि चुनाव जित्ने दाबी गर्छन् ।

‘उम्मेदवारी मनोनयन गराउने बेलामा देखिएको कार्यकर्ताको भीडले पनि माहोल कसको पक्षमा छ भन्ने कुरा पुष्टि भइसक्यो,’ हरिनारायण यादवले भने, ‘आफ्नै भाइ नै अर्को पार्टीबाट उम्मेदवार छन्, तर उनले चुनाव जित्ने माहोल नै छैन ।’ घरमा नै फूट भएको अवस्थामा कसरी चुनाव जित्ने भन्ने सवालमा उनी भन्छन्, ‘विगतमा पनि म संविधान सभाको चुनाव लड्दा भाइ नेपाली कांग्रेसमै थियो, तर मैले चुनाव जितेँ ।’

लोकतन्त्रमा आ–आफ्नो विचारका आधारमा फरक–फरक राजनीतिक दलमा आवद्ध हुन पाउनु नै लोकतन्त्रको सौन्दर्य रहेको उनी बताउँछन् ।

दाजुभाइको यो लडाइँमा कुन पक्षले बाजी मार्छ, त्यो भने चुनावपछि नै थाहा हुनेछ ।

उपनिर्वाचनका लागि राजपाबाट रबिता कुमारी, नेकपाबाट विक्रम चौधरी, जनमत पार्टीबाट अञ्जलीदेवी मण्डल लगायत २० जनाले उम्मेदवारी मनोनयन दर्ता गराएका छन् ।