दाङ – नेत्रविक्रम चन्द ‘विप्लव’ नेतृत्वको नेकपाका केन्द्रीय सदस्य एवम् मध्यपश्चिम कमाण्ड इन्चार्ज चन्द्र बहादुर चन्द ‘विरंजग’को स्वास्थ्यमा गम्भीर समस्या देखिएको छ । विरजंग विप्लवका आफ्नै दाइसमेत हुन् ।

गत असोज ३० गते राति दाङ राजपुर गाउँपालिका मुङग्रेठामा पार्टीको राप्ती ब्युरोको बैठक स्थलबाट प्रहरीले घेरा हालेर नियन्त्रणमा लिएका नेता चन्द अहिले जिल्ला प्रहरी कार्यालय दाङको हिरासतमा छन् ।

घाँटी र छातीमा समस्या देखिएपछि नेता चन्दलाई अस्पताल लगिएको थियो, अस्पतालमा डाक्टरले भर्ना गर्नुपर्छ भनेपनि प्रहरीले मिल्दैन भनेपछि हिरासतमा फर्काएको परिवार स्रोतले बताएको छ ।

राप्ती ब्यूरोको बैठक बसिरहेको स्थानबाट गिरफ्तार पार्टीका केन्द्रीय सदस्य एवम् मध्यपश्चिम कमाण्ड ईन्चार्ज विरंजग लगायत २१ जना नेता कार्यकर्ता अहिले दाङ हिरासतमा संगठित अपराध र हातहतियार खरखजना मुद्दामा थुनामा छन् ।

थुनामा रहेका नेता कार्यकर्तालाई राज्यले न्युनतम मानवीय व्यवहार समेत नगरेको भन्दै चौतर्फी आलोचनासमेत भइरहेको छ । यस्तै नेता चन्दका जेठा छोरा वियस चन्द समेत स्वास्थमा समस्या देखिएपछि एक महिना यता काठमाडौं हस्पिटलमा उपाचार्थ छन् ।