'उपनिर्वाचन नेकपाको अग्निपरीक्षा'

नेपाल कम्युनिष्ट पार्टी(नेकपा)का केन्द्रीय सदस्य एवं कास्की जिल्ला इञ्चार्ज राजकाजी गुरुङ (करण) ले कास्की निर्वाचन क्षेत्र नं २ मा मङ्सिर १४ गते हुने उपनिर्वाचन राजनीतिक हिसाबले पार्टीको अग्निपरीक्षाको रूपमा रहेको बताएका छन् ।

पेशागत व्यवसायी निर्वाचन परिचालन कमिटी पोखरा १७ द्वारा आयोजित विस्तारित भेलाको शुक्रवार पोखरामा उद्घाटन गर्दै उनले निर्वाचनमा पार्टीका उम्मेदवारलाई विजयी बनाउन, मतदाता शिक्षासँगै मतको संरक्षणका लागि नेतृत्व र कार्यकर्ता तह संगठित भएर लाग्न आग्रह गरे ।


Advertisement

सरकारको समृद्धिको अभियानलाई सफल बनाउन कार्यकर्ता उत्पादनसँग जोडिनुको विकल्प नभएको बताउँदै उनले कृषि, पर्यटन र विद्युत् मुलुकको समृद्धिको आधार भएको उल्लेख गरे । नेकपा कास्की जिल्ला अध्यक्ष एवं निर्वाचन परिचालन कमिटीका संयोजक कृष्ण थापाले इमान, जमान र स्वाभिमानसहित निर्वाचनमा जुट्न सकेमात्र विजय सुनिश्चित हुने विश्वास व्यक्त गरे ।

विस्तारित भेला आयोजिक समितिका संयोजक चित्रराज बरालको अध्यक्षतामा भएको कार्यक्रममा नेकपा जिल्ला सदस्य सुवर्ण श्रेष्ठ, पोखरा–१७ का वडाध्यक्ष तीर्थ अधिकारी, कृष्ण लम्साललगायतले निर्वाचनमा सबै एकजुट भएर जुट्नुपर्ने बताए ।


Advertisement

कमेन्ट गर्नुहोस्