श्रीलंकाको राष्ट्रपति निर्वाचनमा गोताबया राजपक्षको जीत, प्रतिद्वन्द्वीले स्वीकारे हार

श्रीलंकाका पूर्व रक्षामन्त्री गोताबया राजपक्षले शनिवार सम्पन्न राष्ट्रपति निर्वाचनमा विजय हासिल गरेका छन् । सिंहालिज बुद्धिस्ट राष्ट्रवादी पार्टीका तर्फबाट उम्मेदवार बनेका राजपक्षले सहज विजय पाएका हुन् । 

आधा मत मात्र गन्न भ्याउँदा राजपक्ष समूहले जीतको दाबी गरिसकेको थियो । 


Advertisement

‘यो स्पष्ट जीत हो । हामीले जित्ने थाहा पाइसकेका थियौं । गोता आगामी राष्ट्रपति हुनेछन् भन्ने विषयमा हामीहरू खुशी छौं । उनलाई भोलि वा पर्सि गोपनीयताको शपथ दिलाइनेछ,’ प्रवक्ता केहेलिया रामबुकवेलाले बताए । 

सत्तारूढ यूएनपी दलका सजित प्रेमदासाले तत्कालै हार स्वीकार गर्दै प्रतिद्वन्द्वीलाई बधाइ दिए । 


Advertisement

गोताबया पूर्व सैन्य जर्नेल हुन् र उनी राष्ट्रवादी तथा निरंकुश प्रवृत्तिका लागि चिनिन्छन् । उनीविरुद्ध भ्रष्टाचार र यातनाको आरोप लगाइएको छ । उनको विजय श्रीलंकाका लागि निर्णायक क्षण हुन सक्नेछ । 

‘हाम्रा सबै भयानक डरहरू सत्य भएका छन्,’ श्रीलंका मुस्लिम काउन्सिलका हिल्मी अहमदले बताए । ‘यस चुनाव परिणामबाट श्रीलंका पूर्णतया विभाजित बनेको छ र अहिले सिंहाली बौद्ध बहुसंख्यक तथा अल्पसंख्यकहरूका बीचको स्पष्ट विभाजन देखिएको छ । देश कसरी एकजुट रहने हो भन्ने ठूलो चुनौतीको विषय बनेको छ ।’

ईस्टर सन्डेका दिन भएका शृंखलाबद्ध आक्रमणको सात महिनापछि चुनाव भएको हो । उक्त आक्रमणमा इस्लामी अतिवादीहरूले होटेल र चर्चहरूमा आक्रमण गरेर २५० जनाभन्दा बढीको ज्यान लिएका थिए र श्रीलंकामा संकटकाल घोषणा गरिएको थियो । 

गोताबया राजपक्षले दाइ महिन्दा राजपक्ष राष्ट्रपति हुँदा सन् २००५ देखि २०१० सम्म रक्षामन्त्रीको भूमिका निर्वाह गरेका थिए । उनी र महिन्दालाई श्रीलंकामा २६ वर्षसम्म चलेको गृहयुद्ध अन्त्य गर्ने श्रेय दिइन्छ । उक्त युद्धमा एक लाखभन्दा बढी मानिसको ज्यान गएको थियो । तर राजपक्ष दाजुभाइविरुद्ध मानवअधिकार उल्लंघन तथा दमनका गम्भीर आरोप लागेका छन् । 

गृहयुद्ध अन्त्य गर्ने बेलामा सेनाको वस्तुगत प्रमुखका रूपमा गोताबयाले तमिल लडाकू तथा सरकारविरोधीहरूलाई खोजीखोजी सिध्याउनका लागि सेनाको ‘डेथ स्क्वाड’ बनाएको आरोप लगाइएको छ ।

द गार्डियनबाट

कमेन्ट गर्नुहोस्