जम्मु–कश्मीरमा हिरासतमा लिइएका ३४ नेताहरूलाई कडा जाडो लागेपछि आइतवार श्रीनगरको होटलबाट सरकारी अतिथिगृहमा सारिएको छ । 

गत अगस्त महिनाको ५ तारिखमा धारा ३७० निलम्बन गरिएपछि उनीहरूलाई नजरबन्दमा राखिएको हो । 

यी नेताहरूमा कश्मीरका पूर्वमन्त्री र विधायकहरू पनि छन् । 

पूर्व मुख्यमन्त्री महबूबा मुफ्तीकी छोरी इल्तिजा मुफ्तीले ट्वीट गरेर प्रहरीले नेताहरूलाई सार्ने बेलामा कुटपिट गरेको आरोप लगाएकी छन् । इल्तिजाका अनुसार, सज्जाद लोन, शाह फैसल र वाहीद पारामाथि दुर्व्यवहार गरिएको छ । 

प्रहरीले यी आरोप अस्वीकार गरेको छ ।

इल्तिजाले भनिन्, ‘सज्जाद लोनलाई कुटपिट गरिएको छ । उनको नयाँ जेलमा झ्यालहरू काठ ठोकेर थुनिएको छ । उनलाई हीटर दिइएको छैन । प्रधानमन्त्री मोदीले उनलाई भाइ भनेका थिए, उनीसँग त यस्तो व्यवहार गरिन्छ भने अरूहरूमाथि के दुर्दशा गरिएको होला, आफैं अनुमान गर्न सक्नुहुन्छ ।’

गेस्टहाउसमा सारिनुअघि नेताहरूलाई सेन्टोर होटलमा राखिएको थियो । उनीहरूको होटलको बिल अहिलेसम्ममा २.६५ करोड भारु उठिसकेको छ । 

यसैबीच नेसनल कन्फरेन्स पार्टीले फारुक अब्दुल्लालाई संसद् सत्रमा सहभागी हुन दिनका लागि माग गरेको छ । फारुक र उनका छोरा उमर विगत १०० दिनदेखि हिरासतमा छन् । 

मोदी सरकारले अगस्ट ५ मा जम्मु–कश्मीरलाई विशेष दर्जा दिने धारा ३७० र ३५क खारेज गरेर दुईवटा केन्द्रशासित प्रदेशमा बाँड्ने निर्णय लिएको थियो ।

एजेन्सी