गाईभैंसी किन्न गाउँ सरकारबाटै अनुदान पाएपछि त्रिपुरासुन्दरी गाउँपालिका–३ धुस्कुनका किसानमा खुशीयाली छाएको छ ।

स्थानीय धुस्कुन कृषि सहकारीमार्फत गाउँ सरकारको अनुदान हात पारेपछि धुस्कुनका पशुपालक किसान खुशी देखिन्थे ।

गाउँपालिकाको अनुदानबाट शनिवार धुस्कुन कृषि सहकारीले ७० जना सदस्यलाई गाईभैंसी किन्नका लागि अनुदान उपलब्ध गराएको छ । 

आठौं वार्षिक साधारणसभाका अवसरमा भैंसी खरिदका लागि ५० जनालाई ३० हजार रुपैयाँका दरले अनुदान प्रदान गरिएको छ । गाई किन्नका लागि २० जनालाई १५ हजार रुपैयाँका दरले अनुदान दिइएको छ ।

गाउँपालिका र वडाको बजेटबाट सहकारीमार्फत ७० जना किसानलाई गाईभैंसी खरिदका लागि अनुदान दिइएको हो । चालू आर्थिक वर्षमा त्रिपुरासुन्दरी गाउँपालिकाले धुस्कुन कृषि सहकारीका लागि १८ लाख रुपैयाँ गाईभैंसी खरिद अनुदान उपलब्ध गराएको र सहकारीले आफ्ना सदस्यलाई सो अनुदान प्रदान गरेको त्रिपुरासुन्दरी गाउँपालिका–३ का वडाध्यक्ष शुकदेव रिसालले जानकारी दिए ।

‘पशुपालनमा प्रोत्साहनका लागि गाउँपालिकाबाट १८ लाख रुपैयाँ अनुदान छुट्याइएको थियो, सहकारीमार्फत किसानका हातमा पुर्‍याइएको छ,’ वडाध्यक्ष रिसालले भने ।

गाउँपालिका अध्यक्ष भूपेन्द्र श्रेष्ठले साधारणसभाको उद्घाटन गरेका थिए । साधारणसभा उद्घाटन गर्दै अध्यक्ष श्रेष्ठले निर्वाहमुखी मात्र नभई व्यावसायिक कृषि र पशुपालनमा लाग्न आग्रह गरे ।

आगामी वर्षका लागि गाईभैंसी खरिदका लागि गाउँपालिकाले २० लाख रुपैयाँ अनुदानको व्यवस्था  गरिदिनेसमेत अध्यक्ष श्रेष्ठले घोषणा गरे । साधारणसभाका अवसरमा उत्कृष्ट कृषकलाई सम्मान समेत गरिएको थियो ।

धुस्कुन कृषि सहकारीका लागि प्रदेश सरकारको उद्योग, पर्यटन, वन तथा वातावरण मन्त्रालयले डेरी उद्योग स्थापनाका लागि ३५ लाख रुपैयाँ बराबरको उपकरण प्रदान गरेको थियो । सहकारीका लागि प्रदेश र स्थानीय सरकारबाट महत्त्वपूर्ण सहयोग मिलेको भन्दै धुस्कुनलाई दुग्धको पकेट क्षेत्रका रुपमा विकास गरिने सहकारीका अध्यक्ष बलराम न्यौपानेले बताए ।