पत्रकार खेम भण्डारी १ घण्टा जेलपछि रिहा

अदालतको अवहेलनाको सजाय पाएका कञ्चनपुरका पत्रकार खेम भण्डारी १ घण्टा जेल बिताएर रिहा भएका छन् ।

कञ्चनपुरकी बालिका निर्मला पन्त हत्या प्रकरणसँग जोडिएको एउटा मुद्दाको अदालती कारवाहीलाई प्रभावित पार्ने गरी समाचार सम्प्रेषण गरेको भन्दै जिल्ला अदालत कञ्चनपुरले पत्रकार भण्डारीलाई दोषी ठहर गरेको थियो ।


Advertisement

अदालतको फैसला कार्यान्वयन गराउने क्रममा पत्रकार भण्डारी मंगलवार १ घण्टा जेल परेका हुन् । अदालतले पत्रकार भण्डारीलाई माफी माग्ने वा सजाय भोग्ने विकल्प समेत दिएको थियो ।


Advertisement

पत्रकार भण्डारीले अदालतले राखेका शर्त पूरा नगरेपछि उनलाई मंगलवार जेलमा राखिएको हो । जिल्ला अदालत कञ्चनपुरले भण्डारीलाई ३ शर्त पूरा गर्नुपर्ने वा १ घण्टा कैद र १ रुपैयाँ जरिवानाको फैसला गरेको थियो । 

जिल्ला बार एसोसिएसनले पत्रकार भण्डारीविरुद्ध अदालतको अवहेलना मुद्दा दायर गरेको थियो । पत्रकार भण्डारीले आफूले कुनै गलत काम नगरेको भन्दै अदालतका शर्त मान्न अस्वीकार गरेका थिए । 

जिल्ला अदालत कञ्चनपुरले गरेको फैसलामाथि पुनरावेदन गर्न आफूलाई म्याद नदिइएको गुनासो पत्रकार भण्डारीले गरेका छन् । अदालत परिसरमा सञ्चारकर्मीलाई प्रतिक्रिया दिँदै भण्डारीले आफूलाई पुनरावेदन गर्ने म्याद नदिई फैसला कार्यान्वयन गरिनु अन्यायपूर्ण भएकाले न्यायका लागि माथिल्लो अदालतमा जाने बताए ।

पत्रकार भण्डारी महेन्द्रनगरबाट प्रकाशित हुने मानखण्ड दैनिकका सम्पादक, रेडियो महाकालीका सञ्चालक तथा न्यूनतम पारिश्रमिक निर्धारण समितिका पूर्व अध्यक्ष समेत हुन् ।

कमेन्ट गर्नुहोस्