रोजगारीका नाममा गाई धपाउन लगाएर कम्युनिस्ट सरकारले जग हँसायो : कांग्रेस

प्रमुख प्रतिपक्षी दल नेपाली कांग्रेसले कम्युनिस्ट सरकारले मकै गोड्ने र गाई धपाउने रोजगारीको सिर्जना गरेर जग हँसाउने काम गरेको आरोप लगाएको छ ।

मंसिर १४ गते हुने उपनिर्वाचनलाई लक्षित गर्दै कांग्रेसले निकालेको घोषणा पत्रमा कम्युनिस्ट सरकारले जग हँसाएको आरोप लगाएको हो ।


Advertisement

मंगलवार पार्टी केन्द्रीय कार्यालय सानेपामा पत्रकार सम्मेलन गरेर प्रवक्ता विश्वप्रकाश शर्माले सरकारमाथि २१ वटा हमला गरेका थिए । 

‘कम्युनिस्ट पार्टीको सरकारले कुनै एक रोजगार कार्यक्रमका नाममा अर्बौ रुपैयाँ खर्च गरेर मकै गोड्ने, सडकका गाई धपाउने र नाली सफा गर्ने आदि ‘रोजगारीको सिर्जना’ गरेर जग हँसाउने कार्य गरेको छ,’ कांग्रेसले जारी गरेको घोषणापत्रमा उल्लेख छ, ‘रोजगारी त त्यो हो जसले एकदिने पिकनिकको क्षणिक मनोरञ्जन होइन एउटा सिंगो जीवनलाई निर्वाह गर्न सक्ने गरी स्थायी प्रबन्धको बन्दोबस्त गर्छ ।’


Advertisement

प्रवक्ता शर्माले पञ्चायतको बिदाइपछि कांग्रेसले लिएको नीतिका कारण सरकारी र निजी क्षेत्रबाट अनेकौं रोजगारी सिर्जना गरेको दाबी गरे । कांग्रेसकै पालामा बैंक तथा वित्तीय संस्था, विद्यालय, स्वास्थ्य चौकी, सञ्चारमाध्यम र एयरलाइन्स जस्ता सरकारी र निजी प्रतिष्ठानहरूले लाखौ रोजगारी सिर्जना गरेको भन्दै प्रवक्ता शर्माले कम्युनिस्ट सरकार आएपछि रोजगारीलाई क्षणिक मनोरञ्जनका रूपमा लिइएको आरोप लगाएका हुन् ।

शर्माले माओवादी हिंसाले रोजगारी सिर्जनाको यात्रामा ध्वंशात्मक ढंगले असर नपुर्‍याएको भए मुलुकमा बेरोजगारीको विकराल स्थिति नबन्ने जिकिर गरे ।

‘वैदेशिक रोजगारीको ढोका खोल्नैपर्ने हाम्रो बाध्यात्मक रोजाइले पनि लाखौं युवाका हातमा ७ समुन्द्रपारी सही, रोजगारीको प्रबन्ध कांग्रेसकै पहल र नेतृत्वमा हुन सक्यो,’ घोषणापत्रमा उल्लेख छ, ‘हिंसा र अस्थिर राजनैतिक वातावरणको प्रतिकुलताबीच पनि नेपाली कांग्रेसको नेतृत्वमा देशले यतिको प्रगति गर्नु चानचुने कुरा होइन ।’

कमेन्ट गर्नुहोस्