नयाँ नेतृत्वलाई गायक–गायिकाको सुझाव : लोक दोहोरी क्षेत्र सुधारौं, सेन्सर सिस्टम लागू गरौं

राष्ट्रिय लोक तथा दोहोरी गीत प्रतिष्ठानले हालैमात्र नयाँ कार्यसमिति पाएको छ ।

सर्जक रमेश बीजीको अध्यक्ष रहेको कार्यसमितिको वरिष्ठ उपाध्यक्षमा रिता थापा मगर छिन् भने प्रथम उपाध्यक्षमा पशुपति शर्मा रहेका छन् ।


Advertisement

अहिलेको नयाँ कार्यसमितिले रचनात्मक काम गरोस् भन्ने अपेक्षा गायक शिरीष देवकोटाको छ । त्यस्तै गायक विक्रम परियार चाहिँ नयाँ टीमबाट कलाकारहरूको राम्रो केयर होस् भन्ने चाहन्छन् ।

द्वितीय उपाध्यक्ष रामजी खाँड, महिला उपाध्यक्ष राधिका हमाल पुन, तृतीय उपाध्यक्ष दिपक खड्का, महासचिव सुवास केसी, उपमहासचिवद्वय शंकर बिसी र शिव हमाललगायतको टीमबाट के अपेक्षा राख्नुभएको छ भनेर हामीले केही गायकगायिकालाई सोधेका छौं । उनीहरूको अपेक्षा र सुझाव यस्तो छ !


Advertisement

शिरीष देवकोटा

रमेश दाइको नेतृत्वलाई शुभकामना छ । संस्थामा हुनुपर्ने मान्छे अध्यक्ष हुनुभएको छ । संस्थाको मुल मन्त्र र उद्देश्य प्राप्तिका लागि बौद्धिक तथा रचनात्मक कामहरू हुनुपर्‍यो । जस्तै यो संगठननै बुझाउनु आवश्यक छ । संस्थाको क्षेत्राधिकारभित्रै नपर्ने मान्छेहरूलाई सदस्यता दिइएको छ । उहाँको कार्यकालमा यसको अन्त्य होस् । यसले लोकगीतको संरक्षण र सम्वर्द्धन गर्ने भनेको छ । तर कुनै पनि कार्यकाल हुन सकेको छैन । लोकगीतका राम्रा पक्ष र विकृतिहरूलाई कसरी न्यूनीकरण गर्न सकिन्छ भनेर बहस गर्नु जरुरी छ । राज्यका विभिन्न तह तथा तप्कासँग समन्वयन गरेर यसको सम्वर्द्धन हुने खालका काम भएका छैनन् । मात्रै भवन बनाउने काम भएको छ । यसपालि चाहिँ रचनात्मक कामहरू गर्नुहोला भन्ने अपेक्षा छ ।

सम्झना भण्डारी

चलचित्रको जस्तै लोक दोहोरीको पनि सेन्सर बोर्ड भइदिए हुन्थ्यो । जसले लोक दोहोरी क्षेत्रमा काम गर्ने कलाकारहरूलाई हित गर्छ ।  मापदण्ड निकालेर त्यसअनुसार नै गीतहरू बजारमा निस्किए हुन्थ्यो । अनि निस्किएका गीतहरूले समय लिन पाउँछन् । अश्लीलता झल्कने गीतहरू नआओस् भन्ने अपेक्षा राखेकी छु ।

विक्रम परियार

प्रतिष्ठानमा केही राम्रा मानिसहरू बाहिरिएका छन् । त्यो दु:खको कुरा रह्यो । रमेश बीजीको लिडिङ पावर कति छ भन्ने बिस्तारै बुझ्दै जाने कुरा हो । गीतसंगीत,  शालिनता र रमेश बीजी पर्यावाची शब्दजस्तै हुन् । रामजी खाँड र रिता थापाजस्ता मान्छे प्रतिष्ठानमा जोडिएका छन् । रिता थापा मगरमा नेतृत्व गर्न सक्ने गुण धेरै नै छ ।

प्रतिष्ठानले केही यस्ता कामहरू गरोस् जसले कलाकारहरूको स्तरोन्नति होस् । रोयल्टीको विषयमा प्रतिष्ठानले काम गरोस् । कलाकारको हकहितका लागि केही राम्रो गर्दिए हुन्थ्यो । गीत संगीतमा दु:ख गर्ने कलाकारहरूलाई केयर गरिदिए हुन्थ्यो भन्ने अपेक्षा छ ।

शर्मिला गुरुङ

अहिलेको अध्यक्ष सर्जक हुनुहुन्छ । उहाँ मौलिकतामा प्राथमिकता दिने मान्छे हो । त्यसैले गीतसंगीतमा केही सकारात्मक परिवर्तन हुन्छ कि भन्ने आश छ । उहाँको तीन वर्षे कार्यकाल हेर्नै बाँकी छ । उहाँलाई चुनेर गल्ती गरेछौं भन्ने नहोस् । समाज भड्काउने र अश्लीलता झल्किने गीतहरू पूर्ण रूपमा बन्द हुन्छ भन्ने अपेक्षा राखेकी छु ।

कमेन्ट गर्नुहोस्