स्वास्थ्य अवस्थामा सुधार आइसकेपनि प्रधानमन्त्री ओली आइसीयुमै, संक्रमणको जोखिम कायमै

प्रधानमन्त्री केपी शर्मा ओलीको स्वास्थ्यमा उल्लेख्य सुधार भएपनि थप संक्रमणबाट हुन नदिन आइसीयुमै राखिएको छ ।

प्रेस सल्लाहकार सूर्य थापाले प्रधानमन्त्री ओलीको स्वास्थ्यमा उल्लेख्य सुधार आएको तर थप संक्रमण हुन सक्ने अवस्थालाई ध्यानमा राखेर मेडिकल टीमले आइसीयुमै निगरानीमा राखेको बताए ।


Advertisement

'मैले बिहान भेटेको थिएँ, उहाँ सामान्य हुनुहुन्छ,' थापाले लोकान्तरसँग भने, 'उहाँको अवस्था सामान्य भएपनि संक्रमणको जोखिम भएकाले आइसीयुमै राखिएको हो ।'

थापाले केही डाक्टरहरूले प्रधानमन्त्रीको स्वास्थ्यका बारेमा बाहिर अफवाह फैलाएको आरोप लगाए ।


Advertisement

प्रधानमन्त्रीलाई सुभेच्छा दिनेहरूले अब अस्पताल नै नपुग्ने हुने गरी अनलाइनमै व्यवस्था गरिएको थापाले बताए । प्रधानमन्त्रीको वेबसाइटमै प्रधानमन्त्रीको स्वास्थ्यलाभको कामना सकिने व्यवस्था गरिएको छ ।

'यसअघि अस्पतालमा नै स्वास्थ्यलाभको पुस्तिका राख्ने चलन थियो,' उनले भने, 'अब त्यो चलन हटाएर डिजिटल रूपमै स्वास्थ्यलाभको कामना गर्न सकिने भएको छ । अस्पतालमा धेरैको भीड हुने भएकाले यस्तो व्यवस्था गरिएको उनको भनाइ थियो ।'

प्रधानमन्त्रीलाई स्वास्थ्यलाभको शुभकामना दिन चाहनेहरूले यहाँ क्लिक गरेर आफ्नो शुभकामना लेख्न सक्नेछन् ।

शुक्रवारसम्म प्रधानमन्त्रीको स्वास्थ्यअवस्थाको बारेमा दिनको दुईपटक प्रेस नोट दिने व्यवस्था थियो । शनिवारबाट त्यो हताइएको छ । 'अहिले उहाँ सामान्य हुँदै जानुभएको छ, आवश्यक पर्यो भने प्रेस नोटमार्फत जानकारी गराइन्छ,' थापाले भने, 'हिजो डाक्टरहरूले पत्रकार सम्मेलन नै गरेर उहाँको स्वास्थ्य अवस्थाका बारेमा सबै बताइसक्नुभएको छ । अब पहिलाजस्तो बिहान बेलुका उहाँको स्वास्थ्यअवस्थाबारे विज्ञप्ति आउँदैन ।'

प्रधानमन्त्रीको पेट दुखेपछि मंगलवार बिहान  मनमोहन कार्डियोथोरासिक भास्कुलर एण्ड ट्रान्सप्लान्ट सेन्टर ल्याइएको थियो । एपेन्डिक्समा संक्रमण देखिएपछि प्रधानमन्त्री ओलीको आकस्मिक शल्यक्रिया गरियो । त्यसपछि उनलाई आइसीयुमा राखिएको छ ।

प्रधानमन्त्री ओलीलाई भेट्न राष्ट्रपति विद्यादेवी भण्डारी, नेकपा अध्यक्ष पुष्पकमल दाहाल 'प्रचण्ड' लगायतका नेताहरू पुगेका थिए । शुक्रवार प्रचण्डले भेटेर केही समय कुराकानी पनि गरे । तर संक्रमण हुने जोखिम भएकाले कतिपय शुभेच्छुकहरू डाक्टर, परिवारका सदस्य र सचिवालयका सदस्यबाट स्वास्थ्यस्थितिको जानकारी लिएर फर्किने गरेका छन् ।

मृगौलाको नियमित डायलासिस गराइरहेका प्रधानमन्त्री ओलीको शल्यक्रियापछि पनि २ पटक डायलासिस भइसकेको छ । शुक्रवार बिहान भएको पत्रकार सम्मेलनमा प्रधानमन्त्रीका निजी चिकित्सक डाक्टर दिव्यासिंह शाहले प्रधानमन्त्रीको मृगौला प्रत्यारोपणका लागि तयारी भइरहेको बताएकी थिइन् ।

 

कमेन्ट गर्नुहोस्