कास्की क्षेत्र नम्बर २ मा समाजवादी पार्टीबाट उम्मेदवारी दिएका धर्मराज गुरुङले जमानत जोगाउन सकेनन् । समावेशिताको मुद्दालाई प्रमुख एजेण्डा बनाएर अघि बढिरहेको समाजवादी पार्टीले गुरुङ समुदायबाट भूतपूर्व गोर्खा सैनिक धर्मराज गुरुङलाई टिकट दिएको थियो । 

गुरुङले १ हजार ९ सय २२ मत मात्र प्राप्त गरे । गुरुङ भएकै आधारमा उनलाई आफ्नो समूदायले भोट त दिएनन् नै, भूपू सैनिकहरूले पनि उनलाई मत दिएनन् । 

लोकान्तरसँग कुरा गर्दै गुरुङले भने, 'तपाईं ढुक्क बस्नुस, भोट तपाईंलाई नै हो भनेर मलाई ढुक्क बनाए । यदि तपाईंलाई विश्वास गर्दैनौं भोट दिन्नौं भनेको भएपनि मलाई खुसी नै हुने थियो । म यता ढुक्क भएर बसें, भोट चाहिँ उनीहरूले अन्तै हाले ।'

लामो समय भारतीय सेनामा काम गरेका गुरुङले भूपू गोर्खाहरूको हितमा लामो समय काम गरेको दाबी गरे । 'मैले जानेको कुराले देशलाई केही फरक पार्छु भन्ने थियो, तर भएन,' गुरुङले भने, 'मैले ४ दशकदेखि बाहिर बसेर यहाँ समाजसेवा गरेको हो, मलाई एकपटक चलाउने मौका दिनुपर्ने हो क्यारे । मैले सिस्टम नै बसाल्छु भन्ने कुरा गरेको थिएँ । मतदाताहरूले मेरो कुरा बुझ्नुभएन ।' 

आफू हार्नुका कारणमध्ये २ वटा उल्लेख्य रहेको गुरुङले लोकान्तरलाई बताए ।

'मैले रिजल्टमा के देखें भन्दा, जनतालाई दुईवटा कुरा पर्‍यो,' 'पहिलो जम्मा दुई वर्षको अवधि हुन्छ, यो सांसद भएर के होला र भन्ने मानसिकता, अर्को चाहिँ मतदाताहरूले सोच बदल्न सकेनन् ।'

लाहुरेहरूले राजनीति नबुझेका हुन् त भन्ने प्रश्नमा गुरुङको जवाफ छ, 'होइन, उहाँहरूले राजनीति बुझ्नुभएको रहेछ । भोट तपाईंलाई नै हो भनेर भन्नुभयो । म सोझो मान्छे, मैले पत्याएर ढुक्क भएर बसें । तर छाप अन्तै हाल्नुभयो । यसलाई त राजनीति खेलेकै भन्नुपर्‍यो नि होइन ?'

गुरुङले आफूले अबको जीवन समाजसेवामा बिताउने बताए ।

'मेरो पूरै परिवार नै समाजसेवामा लागेको छ,' उनले भने, 'राजनीतिमा आएर केही परिवर्तन गर्ने सोच थियो । जनताले मलाई विश्वास गर्न सकेनन् । अब समाजसेवातिर नै लाग्नुपर्ला ।'