गढीमाईको पाँचवर्षे मेलामा दर्शनार्थीको घुइँचो, भोलि पशुबलि दिइने [मेलाको तस्वीरसहित]

विश्वमै सबभन्दा धेरै पशुबलि दिइने मेलाको रुपमा परिचित बारा जिल्लाको गढीमाईमा भक्तजनहरुको घुइँचो लागेको छ । बाराको महागढीमाई नगरपालिका १ बरियारपुरमा पाँच वर्षमा लाग्ने मेलामा नेपाल र भारतका विभिन्न स्थानका भक्तजनको घुइँचो लागेको हो ।

मंसिर १ गतेबाट शुरु भएको मेलाको सोमवार राति विशेष पुजा र मंगलवार पशुबलि दिने कार्यक्रम रहेको छ । सोमवार राति देखि पूजा शुरु भएको र १७ गते मंगलवार पशुबलि दिने तयारी रहेको मन्दिरका पुजारी शम्भु चौधरीले लोकान्तरलाई जानकारी दिए । 


Advertisement

बलिको दिन अत्याधिक भीड लाग्ने भएका कारण मंसिर पहिलो सातादेखि नै दर्शनार्थीले मन्दिरमा पूजा गरेका छन । पाँच वर्षमा लाग्ने गढीमाई मेलामा यसपटक ७५ लाखदेखि १ करोड दर्शनार्थी आउने अनुमान गरिएको मेला व्यबस्थान समितिका सचिव पारस गुप्ताले लोकान्तरलाई जानकारी दिए ।

दर्शनार्थीको सुविधालाई ध्यानमा राख्दै मन्दिर आसपासको क्षेत्रमा पाँचसय अस्थाइ शौचालय तथा पानीका धाराको व्यबस्थापन गरिएको गढीमाइ नगरपालिकाका मेयर उपेन्द्र यादवले जानकारी दिए । टाढाबाट आएका दर्शनार्थीको लागि टेण्ट टागेर धर्मशाला बनाइएको छ । 


Advertisement

मेला व्यवस्थापन मूल समितिका महासचिव मोतीलाल कुशवाहका अनुसार मंसिर १७ गते मंगलबार राँगा तथा १८ गते बोकाको बली दिने कार्यक्रम राखिएको छ । बलिका लागि बिहीवार सम्म ६ हजार राँगा आइसकेका मन्दिर व्यबस्थापन समितिका एक सदस्यले बताए । सोमवार राति सम्मपनि पशुबलिका लागि राँगा आइरहेका छन ।

सर्वोच्च अदालतले गढीमाइमा पशुबलि रोक्ने आदेश दिएपनि मन्दिरमा यसपटक पनि १० हजारको हाराहारिमा बलीका लागि रागाँ आएको मन्दिर व्यबस्थापन समितिले जनाएको छ । सर्वोच्चका न्यायाधीश ईश्वर खतिवडा र अनिलकुमार सिन्हाको संयुक्त इजलासले २०७३ साउन २० गते पशुपलि रोक्न सरकारको नाममा निर्देशनात्मक आदेश जारी गरेको थियो । 

पर्साको सीमावर्ती गाउँबाट आएका हरेराम पटेलले मनले चिताएको पुग्ने विश्वासका साथ बली चढाउन आएको बताए । ‘सर्वोच्चको आदेशका कारण यसपटक राँगा केही कम आएपनि यसक्षेत्रका सर्वसाधारणमा गहिरो धार्मिक आस्थाका कारण बलि रोकिएको छैन’ मेला आयोजक समितिका एक सदस्यले भने ।

पशुबलि दिदा मनोकांक्षा पूरा हुने धार्मिक विश्वास रहेको पुजारी शम्भु चौधरीले बताए । रागाँ, बोका, हासको बली दिने गरिएको छ । मन्दिरमा परेवा उडाउने व्यबस्था समेत गरिएको छ । 

एकजोडी परेवाको १ हजार रुपैयामा विक्री हुने गरेको व्यापारी सवुना खातुनले बताइन । कृष्ण प्रणामी संघ लगायत केही पशुअधिकार वादीले बली रोक्न मागगर्दै गढीमाइमा प्रदर्शन समेत गरेका थिए । 

गढीमाइ मेलामा आउने दर्शनार्थीको स्वागतका लागि बाराको कलैयादेखि स्वागतद्वार राखिएका छन । मेलाको अबसरमा मन्दिर आसपासमा व्यापारिक स्टल राखिएका छन भने नेपाल र भारतका विभिन्न स्थानबाट मगन्तेको समेत भीड लागेको छ ।

हेर्नुहोस् मेलाका तश्वीरहरु

कमेन्ट गर्नुहोस्