पछिल्लो समयमा अनलाइन विज्ञापन आउने र अनलाइनबाटै सामान बूक हुने क्रम बढ्दो छ ।

व्यस्तताका कारण मानिसले फेसबूकमा देखिएको विज्ञानपका आधारमा अनलाइनबाटै सामान किन्ने गरेका छन् ।

आजकाल घरजग्गा कारोबार, सवारीसाधन तथा विभिन्न सौन्दर्य सामग्री, लत्ताकपडादेखि खानेकुरा अनलाइनबाट बूक हुन्छ र घरमै आपूर्ति हुन्छ । 

यसरी सामान खरिदमा विचार पुर्‍याइएन भने ठगिन सक्ने प्रबल सम्भावना छ । यस्तै एउटा घटना काठमाडौंमा सार्वजनिक भएको छ ।

सामाजिक सञ्जालमा देखिएको अनलाइन विज्ञापनबाट सम्पर्कमा आएका व्यक्तिलाई अमेरिकाबाट ल्याइएको आइफोन, ल्यापटप, मोबाइल, क्यामरा, घडी र शृङ्गार लगायतका सामान सस्तो मूल्यमा दिने भनेर ठगी गरेको खुल्न आएको छ । 

महानगरीय अपराध नियन्त्रण महाशाखाका प्रमुख प्रहरी वरिष्ठ उपरीक्षक सहकुलबहादुर थापाले यसरी विज्ञापन गरेर केही व्यक्तिले लाखौं ठगी गरेको खुल्न आएको जानकारी दिए । अनलाइनबाट सम्पर्कमा आएका उपभोक्तालाई ठगी गरेको भन्ने सूचना आएपछि महाशाखाबाट खटिएको प्रहरी टोलीले सोमवार २ जनालाई भक्तपुरबाट पक्राउ गरेको छ ।

पक्राउ पर्नेमा सिन्धुपाल्चोकको साँगाचोकगढी घर भई भक्तपुर बस्ने अमिर थापा र भक्तपुर कमलविनायकका अमन अवाल रहेको महाशाखाले जनाएको छ । १ महिनाको अवधिमा उनीहरूले सर्वसाधारणबाट ८ लाख रुपैयाँ बढी ठगी गरेको खुल्न आएको र उनीहरूको विषयमा थप अनुसन्धानका लागि मंगलवार महानगरीय प्रहरी परिसरलाई बुभाइएको महाशाखाले जनाएको छ ।

यस्ता शंकास्पद गतिविधि देखिएमा प्रहरीलाई खबर गर्न समेत महाशाखाले अनुरोध गरेको छ ।