१३औं दक्षिण एसियाली खेलकुद(साग)अन्तर्गतको महिला फूटबल प्रतियोगिताको आज पोखरामा सम्पन्न पहिलो खेलमा नेपालले विजय शुरूआत गरेको छ ।

पोखरा रंगशालामा सम्पन्न भएको खेलमा नेपालले श्रीलंकालाई १–० ले पराजित गरेको हो । 

नेपालले पूरा समय श्रीलंकालाई दबाबमा राखेको भए पनि खेलको अन्तिम मिनेटमा गोल गर्न सफल भयो । नेपालका लागि सरु लिम्बूले ८८ औं मिनेटमा गोल गर्दै नेपाललाई अग्रता दिलाएकी थिइन् ।

खेलको १५औं मिनेटमा सवित्रा भण्डारी साम्भाले डिबक्सभित्र पाएको अवसरलाई सही दिशा दिन सकिनन् । नेपालले प्रतिद्वन्द्वी श्रीलंकालाई खेलको शुरुआतदेखि नै दबाबमा राखेको थियो । 

 नेपालका गोल किपर अन्जिला थम्बापो सुब्बाले खेलको १८औं मिनेटमा बल टच गरेकी थिइन् । श्रीलंकाले खेल अवधिभर रक्षात्मक खेल खेलेका थिए ।

सो को अवसरमा नेपाली खेलाडीले पटक पटक डिबक्सभित्र पाएको राम्रो अवसरलाई सदुपयोग गर्न सकेको थिएन् ।

टिमका क्यापटेन निरू थापाले खेलको ३८औं मिनेटमा हानेको प्रहारलाई श्रीलंकाका गोलकिपर अयोमी विजेराथना ले सहजै रोकिन् । 

नेपाली टिमका जर्सी नं नौ लगाएर मैदानमा उत्रिएकी सवित्रा भण्डारी खेल अवधिभर दर्शकको नजरमा रहिन् ।

खेल अवधिभर नेपालले दबाब राखेको भए पनि नतिजा निकाल्न नसके पछि नेपाली महिला टिमका हेड कोच हरि खड्काले खेलको ३२ औं मिनेटमा दीपा राईलाई मैदान बाहिर निकालेर सरुलाई मैदानभित्र प्रवेश गराएका थिए ।

खेल अवधिभर पूरा दबाब राखेको नेपालले दोस्रो हाफको १३औं मिनेटमा साम्भाले प्रहार गरेको बल क्रस बारबाट बाहिरिएको थियो । 

खेलपश्चात श्रीलंका महिला फूटबल टिम सहायक प्रशिक्षक डिफानी सफरसिन्हाले नेपालले खेलमा हारेपनि सन्तुष्ट रहेको बताए ।

उनले नेपालसँगको खेलमा खेलाडीले राम्रो खेल प्रदर्शन गरेको प्रतिक्रिया दिए । नेपाली महिला फूटबल टिमका मुख्य प्रशिक्षक हरि खड्काले आजको श्रीलंकाविरुद्धको खेलमा उत्कृष्ट प्रदर्शन गरेको बताए ।