प्रमुख प्रतिपक्षी दल नेपाली कांग्रेसले मङ्सिर २६ गतेदेखि केन्द्रीय समितिको बैठक बोलाएको छ ।

उपनिर्वाचनपछि पहिलोपटक बस्न लागेको केन्द्रीय समितिको बैठकमा उपनिर्वाचनसहित अन्य विषयमा छलफल हुने मुख्य सचिव कृष्ण पौडलले बताए ।

'उपनिर्वाचनको समीक्षा लगायत पार्टीको सांगठानिक विषयमा छलफल गर्ने तयारी छ,' पौडेलले भने, 'यससँगै पार्टीको आन्तरिक काम कारवाही, समसामयिक राजनीतिक मुद्दालगायत विषयमा केन्द्रीय समिति बैठकले छलफल गरेर नयाँ धारणा सार्वजनिक गर्नेछ ।'

उपनिर्वाचनमा नेपाली कांग्रेसले अपेक्षाकृत प्रदर्शन गर्न नसकेको आरोप लाग्दै आइरहेको छ ।

कांग्रेसका केन्द्रीय समिति सदस्य डा. चन्द्र भण्डारीले लोकान्तरसँग कुरा गर्दै उपनिर्वाचनमा कांग्रेसले अपेक्षित नतिजा हासिल गर्न नसकेको टिप्पणी गरे ।

'उपनिर्वाचनमा ‘क्लीन स्वीप’ गर्ने अवसरलाई कांग्रेसले गुमायो,' भण्डारीले भने, 'उपनिर्वाचनले दुई वर्षको अवधिमा सरकारको अलोकप्रियताको सूचक देखाएको छ र अर्को चुनावसम्म नेकपा झनै अलोकप्रिय बन्ने र कांग्रेस पहिलो दल बन्न सक्ने मेरो बुझाई छ ।'