नेपालका लागि भारतीय राजदूत मञ्जिवसिंह पुरीले नेपाल–भारतबीच रहेको सीमा मुद्दा सद्वपक्षीय वार्ताबाट समाधान गर्न सकिने बताएका छन् ।

आफ्नो नेपाल कार्यकालको अन्त्यमा शनिवार गोरखापत्रसँगको अन्तर्वातामा उनले सीमा लगायतका द्विपक्षीय विवादका मुद्दालाई संवादबाट समाधान गर्न सकिने र त्यसको प्रक्रिया शुरू भएको बताए ।

उनी आउँदो पुस १५ बाट सेवा निवृत्त हुँदै छन् । 

भारतले सार्वजनिक गरेको पछिल्लो राजनीतिक नक्सामा नेपालको कालापानी क्षेत्र भारतीय भूमिभित्र समेटिएकोमा भारत सरकारको विरोध हुँदै आएको छ । नक्साको विरोधमा देशका विभिन्न ठाउँमा प्रदर्शन पनि भए ।

‘त्यो नक्सा भारतभित्रका राज्यहरूको सीमामा भएका परिवर्तनसँग सम्बिन्धित थियो । नेपाललगायत अन्य कुनै देशको बाहिरी सिमानासँग सम्बन्धित थिएन।’ उनले भने,‘जुन सिमाना विगतका नक्साहरूमा थियो, त्यही नै नयाँ नक्सामा पनि थियो ।’ गोरखापत्र दैनिकमा खबर छ ।