बालुवाटारमा आराम गरिरहेका प्रधानमन्त्री ओलीले साग समापन समारोहमा पठाए भिडियो सन्देश

प्रधानमन्त्री केपी शर्मा ओलीले तेह्रौं दक्षिण एसियाली खेलकूद (साग)को समापन समारोहमा भिडियोमार्फत सम्बोधन गरेका छन् ।

एपेन्डिक्सको शल्यक्रियापछि अस्पतालबाट डिस्चार्ज भएर आफ्नो निवास बालुवाटारमा आराम गरिरहेका प्रधानमन्त्रीले भिडियोमार्फत समापन समारोहमा सम्बोधन गरेका हुन् ।


Advertisement

'यसपल्ट पहिला भन्दा बढी खेल भएका छन्, पदकहरू पनि धेरै राखिएका छन्,' प्रधानमन्त्री ओलीले भने, 'समग्रमा तेह्रौं साग ऐतिहासिक खेलकूद प्रतियोगिताका रूपमा रह्यो । सागले दक्षिण एसियाली देश र जनताका बीचमा एकता, मित्रता अभिवृद्धि गर्ने अपेक्षा गरिन्छ र त्यो अपेक्षा यसपटकको खेलकुदले सफलतापूर्वक पूरा गरेको छ ।'

प्रधानमन्त्रीले सम्बोधनका क्रममा खेलकुद प्रतियोगिताका सबै पक्षलाई धन्यवाद र बधाई पनि दिए ।


Advertisement

'काठमाडौँ पोखरा र जनकपुर बाट खेलहरू सफलतापूर्वक सम्पन्न हुनु र सुखद समापनमा आइपुग्नु ज्यादै खुसीको कुरा हो,' सम्बोधनका क्रममा प्रधानमन्त्री ओलीले भने, 'यस सन्दर्भमा सफलताका लागि योगदान गर्नुहुने नेपाल लगायत सबै देशका सरकारहरू र खेलक्षेत्रका व्यक्तित्वहरूलाई धन्यवाद भन्न चाहन्छु ।'

प्रधानमन्त्री ओलीले नेपाल भ्रमण वर्ष २०२० लाई सफल बनाउन साग खेलकुदले योगदान गर्ने अपेक्षा गरे । 'नेपाल भ्रमण वर्ष २०२० लाई सफल बनाउन र योगदान पुर्याउने विश्वास गरेको छु,' उनले भने, 'खेलमा सहभागीलाई भ्रमण वर्षलाई मदत पुग्नेगरी योगदान गर्नुहुनेछ भन्ने अपेक्षा गरेको छु ।'

प्रधानमन्त्री ओलीले खेलमा अनुशासन प्रदर्शन गरेकोमा नेपाली खेलाडीलाई पनि धन्यवाद दिएका छन् ।

कमेन्ट गर्नुहोस्