पौडेल पक्षले केन्द्रीय समिति बैठक बहिष्कार गरेपछि देउवा पनि झोक्किँदै निस्किए

file photo

नेपाली कांग्रेसको चौधौं महाधिवेशनको कार्यतालिकाबारे केन्द्रीय समिति बैठकमा छलफल हुनुपर्ने माग वरिष्ठ नेता रामचन्द्र पौडेल र महामन्त्री शशांक कोइराला पक्षले केन्द्रीय समिति बैठक बहिष्कार गरेका छन् ।

सभापति शेरबहादुर देउवाले बिहीवारको केन्द्रीय समिति बैठकका लागि तयार पारेका ९ बुँदे प्रस्तावमा महाधिवेशनको कार्यतालिका समावेश नभएपछि पौडेल पक्षले बैठक बहिष्कार गरेको हो ।


Advertisement

बैठक अवरुद्ध भएपछि सभापति देउवा पार्टी कार्यालयबाट निस्केर हिंडेका छन् ।

सभापति देउवापक्षीय मानिने केन्द्रीय सदस्य मोहन बस्नेतले पौडेल पक्ष अलोकतान्त्रिक भएको टिप्पणी गरे ।


Advertisement

'आफूले भनेजस्तो भए लोकतन्त्र, नभए अलोकतन्त्र भन्ने हुँदैन,' बस्नेतले लोकान्तरसँग भने, 'विमति राखेरै भएपनि त बैठकमा सहभागी हुन सकिन्छ नि, तर उहाँहरूले लोकतान्त्रिक पद्धति अपनाउनु भएन ।'

बस्नेतले केही विमति भएपनि सल्लाह र छलफल गर्न सकिने वातावरण कायमै रहेकाले बैठक नै अवरुद्ध गर्ने क्रियाकलाप गर्न नहुने स्पष्ट पारे ।

'गएको उपनिर्वाचनमा हामीले हारेको ठाउँमा जितेका छौं, यसलाई नेतृत्वको सफलताको रूपमा लिनुपर्दैन ?' बस्नेतले प्रश्न गरे, 'आफूले भनेजस्तो नभए नेतृत्वको बदनाम गराउने प्रवृत्ति ठीक होइन ।'

उनले महाधिवेशन कसरी र कहिले सम्पन्न गर्ने भन्दा पनि आफूलाई कसरी उभ्याउने भन्ने प्रश्न महत्त्वपूर्ण रहेको बताए ।

बिहीवार साढे ४ बजे केन्द्रीय समिति बैठकका लागि नेताहरू पार्टी केन्द्रीय कार्यालय आएका थिए । वरिष्ठ नेता पौडेलसहित पूर्व महामन्त्री प्रकाशमान सिंह, महामन्त्री शशांक कोइराला, केन्द्रीय सदस्य चन्द्र भण्डारी, रामकृष्ण यादव लगायतले बैठकमा सहभागिता जनाउन नसक्ने भन्दै पौडेलको कार्यकक्षमा जम्मा भएका थिए ।

नेता पौडेलले बैठकको कार्यसूचीमा महाधिवेशनको कार्यतालिकाको विषय राख्न सुझाव दिएपनि सभापति देउवाले कुनै जवाफ नदिएपछि पौडेल पक्षले बैठक बहिष्कार गरेको हो ।

सभापति देउवाले बिहीवारको बैठकमा पार्टीका विभिन्न विभागबारे निर्णय गराउने तयारी गरेका थिए । तर पौडेल पक्षले पार्टी महाधिवेशनमा केन्द्रित हुनुपर्ने माग राख्दै आएको छ । उपनिर्वाचनपछि महाधिवेशनको कार्यतालिका ल्याउने यसअघिको बैठकको सहमति देउवा पक्षले कार्यान्वयन नगरेपछि पौडेल पक्ष असन्तुष्ट बनेको छ ।

कांग्रेसको विधान अनुसार पार्टी महाधिवेशनको १ वर्षअघि नै स्थानीय तहका अधिवेशन हुनुपर्ने व्यवस्था रहेको पौडेल पक्षले जनाएको छ । आगामी फागुनमा पार्टीको १३ औं महाधिवेशन भएको ४ वर्ष पूरा हुँदैछ । फागुनमा स्थानीय तहका अधिवेशन गर्न अहिले नै कार्यतालिका निर्धारण गर्नुपर्ने पौडेल पक्षको अडान रहेको केन्द्रीय सदस्य रामकृष्ण यादवले बताए ।

 

कमेन्ट गर्नुहोस्