प्रमुख प्रतिपक्षी दल नेपाली कांग्रेसले पछिल्ला सडक दुर्घटनाहरूमा सरकार मूकदर्शक भएर बसिरहेको आरोप लगाएको छ ।

आइतवार अपराह्न केन्द्रीय पार्टी कार्यालयमा बसेको केन्द्रीय समिति बैठकले बितेको दुई महिना यता कयौं सडक दुर्घटनामा देशव्यापी रुपमा मृत्युको तथ्याङ्क बढ्नु अत्यन्त चिन्ताजनक रहेको भन्दै सरकारको ध्यानाकर्षण गराएको हो ।

'दोलखाको कालिन्चोकबाट भक्तपुर आउँदै गरेको बस आज विहान सिन्धुपाल्चोकमा दुर्घटना हुँदा १४ जनाको मृत्यु र १८ जना गम्भीर घाइते भएको घटनाप्रति कार्यसमितिको यो बैठक गहिरो दुःख व्यक्त गर्दछ,' बैठकपछि जारी कांग्रेसले जारी गरेको निर्णयमा भनिएको छ, 'घाइतेहरुको शीघ्र स्वास्थ्यलाभको कामना गर्दै उहाँहरुको उचित उपचारको प्रबन्ध गर्न सरकारसँग माग गर्दछ ।'

गत मंसिर १७ गते बाग्लुङमा भएको सडक दुर्घटनामा १४ जनाको मृत्यु, मंसिर १६ गते सुनसरीमा ६ जनाको मृत्यु, मंसिर ११ गते अर्घाखाँचीमा १९ जनाको मृत्यु, कात्तिक १७ गते सिन्धुपाल्चोकमा १७ तथा असोज २४ गते सिन्धुपाल्चोकमा ११ जनाको मृत्यु समेत गरेर बितेको दुई महिना यता अन्य कयौं सडक दुर्घटनामा मृत्युको तथ्याङ्क बढ्नु अत्यन्त चिन्ताजनक विषय रहेको कांग्रेसले जारी गरेको प्रेस विज्ञप्तिमा उल्लेख छ ।

'यो तथ्याङ्कले सडक यात्रामा नागरिक जीवनको रक्षा गर्नु पर्ने सरकार कहाँ छ ? भन्ने प्रश्न गम्भीर रुपमा उब्जिएको छ,' विज्ञप्तिमा भनिएको छ, 'बाँकेको कोहलपुरमा विद्यालय प्रवेशद्वार अघिल्तीरै सानी बालिकालाई ट्रकले कुल्चनु र घटनामा प्रहरीले संयमता नराख्दा थप द्वन्द सिर्जना हुनु दुःखद छ । नेपाली कांग्रेस घाइते ती बालिकाको सम्पूर्ण उपचार गर्न सरकार समक्ष माग गर्दछ ।'

कांग्रेसले सडक दुर्घटना नियन्त्रण गर्न सरकार असफल भएको ठहर गर्दै सरकारलाई दुर्घटनाको मुकदर्शक भएर बसेको आरोप लगाएको छ ।

आइतवारको बैठक वरिष्ठ नेता रामचन्द्र पौडेल समूहले बहिष्कार गरेको थियो । केन्द्रीय समितिको बैठकमा १४ औं महाधिवेशनको कार्यतालिका छलफल गर्ने कुनै सूची नराखिएको भन्दै पौडेल समूहले गत बिहीवार देखि बैठक बहिष्कार गर्दै आइरहेको छ ।

आइतवार बसेको बैठकमा उपसभापतिद्वय बिमलेन्द्र निधि, विजयकुमार गच्छदार, केन्द्रीय सदस्य बालकृष्ण खाण र रमेश लेखकले आफ्नो धारणा राखेका थिए । अर्को बैठक सोमवारलाई बोलाइएको छ ।