विश्व प्रख्यात कोरियन गाडी उत्पादक कम्पनी किया मोटर्सले ललितपुरको जाउलाखेलमा अत्याधुनिक सुविधा सहितको शोरुम आजबाट सञ्चालनमा ल्याएको छ ।

थ्रीएस (सेल्स,सर्भिस, स्पेयर पार्ट) सहितको शोरुमको शुक्रवार उद्घाटन ललितपुर महानगरपालिका प्रमुख चिरिबाबु महर्जनले गरे ।

शोरुममा कियाबाट उत्पादन भएका नेपालमा उपलब्ध सबै गाडी पाउनुका साथै बिक्रीपछिको सेवा पनि दिने कम्पनीले जनाएको छ । करीब ३ रोपनी क्षेत्रफल रहेको शोरुममा २५ जनाभन्दा बढी प्रबिधिक तथा कर्मचारी सेवामा रहेका छन् । 

शोरुम उद्घाटनसँगै शुक्रवारै नेपालमा बहुप्रतिक्षित किया सेल्टोस अनावरण पनि गरिएको छ । विश्वभरका मानिसको पहिलो रोजाइ बनेको किया मोटर्स कोरियन कम्पनी हो ।

नेपालमा समेत ग्राहकको अत्याधिक माग रहेपछि सेल्टोस नेपालमा बिक्री शुरू गरेको किया जाउलाखेलका प्रमुख शंकु घिमिरेले जानकारी दिए ।

सेल्टोसको मूल्य नेपालम बजारमा ४९ लाख ९० हजार देखि ६६ लाख ९९ हजार सम्म पर्ने कम्पनीले जानकारी दिएको छ । किया जाउलाखेलले सुरुवाती बुकिङमा १ लाख ५० हजारसम्मको नगद छुटको सुविधा दिएको छ । जसले ग्राहकलाई आफ्नो रोजाइको गाडी किन्न सहज हुने कम्पनीको विश्वास छ । 

‘सेन्ट्रोस हाल भारतमा सर्वाधिक बिक्री हुने गाडीको सूचीमा चौथो नम्बरमा छ । चाँडै नेपाल र भारत दुवै ठाउँमा सेल्टोस एक नम्बरमा आउँछ,’ किया जाउलाखेलमा प्रमुख घिमिरेले भने, ‘सेल्टोस सुविधा र सुरक्षा दुवैका दृष्टिकोणले राम्रो छ, त्यसैले ग्राहकहरूले अवश्य रुचाउनुहुनेछ ।’

कियाले सन् २०१९ देखि आफ्नो उत्पादन भारतमा शुरू गरेको थियो । भारतमा निकै लोकप्रिय भएको सेल्टोस नेपालमा पनि सफल हुने कम्पनीको विश्वास छ ।

किया जाउलाखेलबाट अत्याधुनिक सुविधा सहितका विद्युतीय गाडी पनि नेपाली बजारमा बिक्री शुरू गरिएको छ । कियाले यसअघि बिक्री शुरू गरेको  स्पोर्टेज गाडी नेपाली बजारमा सर्वाधिक रुचाइएको छ ।