डेपुटी गभर्नर श्रेष्ठलाई सफाई

सम्पत्ति शुद्धीकरणमै संलग्न र यससम्बन्धी क्रियाकलापमा अहसयोगलगायत आरोप लागेका नेपाल राष्ट्र बैंकका डेपुटी गभर्नर शिवराज श्रेष्ठलाई सरकारले सफाई दिएको छ ।

सोमबार बसेको मन्त्रिपरिषद बैठकले उनलाई सफाई दिएको सञ्चार, सूचना प्रविधी मन्त्री तथा सरकारका प्रवक्ता गोकुल बाँस्कोटाले बताए। असोज ३० गतेको मन्त्रिपरिषद बैठकले श्रेष्ठले सम्पत्ति शुद्धीकरण गरेको, वित्तीय क्षेत्रमाथि अनुचित गतिविधी गरेको, सम्पत्ति शुद्धीकरण निवारणका प्रयासलाई अवमूल्यन गरेको, बैंक तथा वित्तीय संस्थाको नियमनमा बदनियत राखेको, विदेश भ्रमण जाँदा फर्जी कागजात पेश गरी भत्ता भुक्तानी लिएको आरोप किटान गरी छानबिन गर्ने निर्णय गरेको थियो। राष्ट्र बैंकका सञ्चालक समितिका सदस्य श्रीराम पौडेलको संयोजकत्वमा गठित समितिले उल्लेखित आरोपमाथि छानविन गरी प्रतिवेदन मन्त्रीपरिषदमा पेश गरेको थियो।


Advertisement

मन्त्रिपरिषदका निर्णय सार्वजनिक गर्न बिहीबार आयोजित पत्रकार सम्मेलनमा मन्त्री बाँस्कोटाले प्रश्न उठेका विषयमा केही पनि नभेटिएपछि सफाई दिएको बताए। ‘उहाँमाथि छानविन भएको हो। राष्ट्र बैंकबाट छानविन प्रतिवेदन पनि प्राप्त भएको हो। छानविनमा कुनै त्यस्तो नदेखिएपछि सफाई पाएको अवस्था हो,’ उनले भने।

यसबारेको मन्त्रिपरिषदको निर्णय भने प्रेस विज्ञप्तिमा उल्लेख गरिएको छैन। एक सञ्चारकर्मीले गरेको प्रश्नमा उनले केही पनि फेला नपरेपछि सफाईको निर्णय भएको सुनाएका हुन्। ‘प्रश्न उठेपछि छानबिन हुनु स्वभाविक हो, छानविन हुँदा केही पनि पाइएन भने फटाहा हो, भ्रष्ट हो भनेर करार गर्न मिल्दैन,’ उनले भने, ‘जे कुरा खोजबिन भयो, त्यो नभेटिएपछि सफाई पाएको अवस्था छ।’


Advertisement

प्रधानमन्त्री केपी शर्मा ओली नै श्रेष्ठमाथि लागेको आरोपमाथि सहमत भएपछि उनलाई निलम्वन गरी स्पष्टीकरण सोध्ने निर्णय मन्त्रिपरिषदले गरेको थियो। अर्थमन्त्री युवराज खतिवडा अमेरिका भ्रमणमा रहेको बेला सम्पत्ति शुद्धीकरण अनुसन्धान विभागले श्रेष्ठका क्रियाकलापबारे प्रधानमन्त्री ओलीलाई जानकारी गराएलगत्तै निर्णय भएको थियो। कान्तिपुर दैनिकमा खबर छ ।

छापाबाट
छापाबाट

लेखकबाट थप...

कमेन्ट गर्नुहोस्